काठमाडौं , चाडपर्वका बेला वस्तु आपूर्ति सहज बनाउने उद्देश्यले नेपाल–चीन प्रमुख व्यापारिक नाका तातोपानी आज (कात्तिक १ गते) देखि तीन दिनका लागि खुल्ने भएको छ। उद्योग, वाणिज्य तथा आपूर्ति मन्त्रालयका अनुसार कात्तिक १ देखि ३ गतेसम्म मालवाहक सवारीसाधनलाई मात्र नाकाबाट आवतजावत गर्न अनुमति दिइएको छ।
नेपाली पक्षको विशेष आग्रहलाई सम्बोधन गर्दै चिनियाँ पक्ष तीन दिनका लागि नाका अस्थायी रूपमा सञ्चालन गर्न सहमत भएको उद्योग, वाणिज्य तथा आपूर्तिमन्त्री दीपक कुमार साहले जानकारी दिएका छन्। मन्त्रालयले यस कदमबाट चाडपर्वको समयमा बजारमा अत्यावश्यक वस्तुको आपूर्ति व्यवस्थापनमा ठूलो सहयोग पुग्ने अपेक्षा राखेको छ।
तथापि, यो अनुमति मालवाहक सवारी साधनका लागि मात्र सीमित रहेकाले यात्री तथा अन्य सर्वसाधारणको आवागमनका लागि भने नाका खुला गरिएको छैन। तीन दिनको सीमित अवधिमा सामान सीमापार गराएर बजारसम्म ल्याउन ढुवानी, भन्सार जाँचपास र वितरण प्रक्रियाबीच प्रभावकारी समन्वय आवश्यक हुने देखिएको छ।
कात्तिक ३ गतेपछिको नाका सञ्चालनबारे भने अहिलेसम्म कुनै थप निर्णय भएको छैन। यस निर्णयले तत्कालका लागि व्यापारीहरूलाई राहत पुर्याए पनि दीर्घकालीन ढुवानीका लागि भने थप स्पष्टता आवश्यक रहेको व्यवसायीहरूको भनाइ छ।
