१३ असोज, २०८३ (२९ सेप्टेम्बर, २०२६)
बागलुङ। पछिल्लो तीन दिनयता अविरल वर्षासँगै आएको पहिरोका कारण बागलुङमा मृत्यु हुनेको सङ्ख्या १२ पुगेको छ। ताराखोला गाउँपालिका-५ सिपमा पहिरोले घर पुरिँदा थप दुई जनाको मृत्यु भएपछि मृतकको सङ्ख्या १२ पुगेको हो। पहिरोमा परी एक जना अझै बेपत्ता छिन्।
जिल्ला प्रहरी कार्यालय बागलुङका प्रहरी उपरीक्षक फणीन्द्र प्रसाईँका अनुसार ताराखोला-५ मा घर पुरिँदा ५५ वर्षीय दिलबहादुर पुन र उहाँकी सासु म्याग्दी मालिका गाउँपालिका-२ की ७९ वर्षीया नरमाया रोकाको मृत्यु भएको हो। सोही घटनामा पुनकी श्रीमती, दुई छोरा र बुहारी सामान्य घाइते भएका छन्।
यसअघि शनिबार ताराखोलामै पहिरोमा परी एक जनाको मृत्यु भएको थियो भने आइतबार तमानखोला गाउँपालिकामा चार जना र निसीखोला गाउँपालिकामा पाँच जना गरी नौ जनाको ज्यान गएको थियो। तमानखोलामा पहिरोले घर बगाउँदा एक जना अझै बेपत्ता छिन्। जिल्लाभर बाढी-पहिरो प्रभावित क्षेत्रमा सुरक्षाकर्मीको टोली उद्धार र राहतमा खटिएको छ।
