काठमाडौँ। अखिल नेपाल फुटबल संघ (एन्फा) को सातदोबाटोस्थित केन्द्रीय कार्यालयमा प्रहरीको केन्द्रीय अनुसन्धान ब्युरो (सीआईबी) को टोलीले पुगेर छापा मारेको छ। एन्फाभित्र भएका वित्तीय तथा प्रशासनिक अनियमितताबारे अनुसन्धान गरिरहेको सीआईबीले महत्त्वपूर्ण कागजातहरू नियन्त्रणमा लिनुका साथै पदाधिकारीहरूसँग सोधपुछ सुरु गरेको हो।
शुक्रबार साँझ एन्फा कार्यालय पुगेको प्रहरी टोलीले कोषाध्यक्ष रवीन्द्र जोशीलाई नियन्त्रणमा लिई गहन सोधपुछ गरिरहेको छ। सीआईबीका उच्च अधिकारीका अनुसार अनुसन्धानका क्रममा आवश्यकता परेमा उनलाई नियन्त्रणमा लिएर हिरासतमा राखिनेछ। सीआईबीका प्रवक्ता एसएसपी अनुपम शमशेर जबराले एन्फामाथि भइरहेको अनुसन्धानकै सिलसिलामा टोली कार्यालय पुगेको पुष्टि गरेका छन्।
राष्ट्रिय खेलकुद परिषद् (राखेप) को निलम्बन र त्यसलगत्तै फिफा (FIFA) ले एन्फामाथि प्रतिबन्ध लगाएको झन्डै चार महिना भइसकेको छ। बिहीबार मात्रै एन्फा महासचिव किरण राईले पत्रकार सम्मेलन गरी आगामी सोमबारदेखि कार्यालय खोलेर खेलकुद गतिविधि सञ्चालन गर्ने घोषणा गरेका थिए। तर, सो घोषणाको भोलिपल्टै सीआईबीले एन्फा मुख्यालय पुगेर कागजातहरू नियन्त्रणमा लिएपछि अनुसन्धान थप पेचिलो बनेको छ।
