काठमाडौँ। रसुवास्थित चिलिमे जलविद्युत् आयोजनाको सुरुङभित्र फसेका मानिसहरूको खोज तथा उद्धार कार्यमा महत्वपूर्ण र आशालाग्दो सङ्केत देखिएको छ। नेपाली सेनाको उद्धार टोलीलाई उद्धृत गर्दै राष्ट्रिय स्वतन्त्र पार्टी (रास्वपा) का सांसद इन्जिनियर श्रीराम न्यौपानेले सुरुङको करिब १०५ मिटर भित्रबाट बाहिर चिसो हावाको दोहोरो बहाव भइरहेको र भित्र पठाइएको आवाजको प्रतिध्वनि (इको) आएको जानकारी दिएका छन्।
गत भदौ १० गते भोटेकोसी नदीमा आएको विनाशकारी बाढीका कारण चिलिमेको सुरुङभित्र ६ जना कर्मचारी तथा मजदुरहरू फसेको आशङ्का गरिएको छ। हाल नेपाली तथा विदेशी विज्ञहरूसहितको संयुक्त टोलीले उद्धार कार्यलाई तीव्र बनाएको छ। उद्धार टोली सुरुङ छिचोलेर ६० मिटर लम्बाइ, २५ मिटर उचाइ र २० मिटर चौडाइ रहेको विद्युत्गृहसम्म पुग्ने प्रयासमा छ, जहाँ पुग्न अब करिब दुई सय मिटर मात्र बाँकी छ। विद्युत्गृहको माथिल्लो भागमा चामल, पानी, चिनी, चिया र पर्याप्त बत्तीका लागि ठूलो ब्याट्री बैंक रहेकाले फसेका व्यक्तिहरू सुरक्षित रहेको अनुमान गरिएको छ।
उद्धार स्थलसम्म पुग्ने बाटो खुलाउन थप मेसिन र अपरेटर परिचालन गर्नुका साथै आवश्यक परे विस्फोटक पदार्थ प्रयोग गर्ने तयारी गरिएको छ। यस्तै ड्रोनमार्फत पाइलट वायर जोडेर धुन्चेको बिजुली चिलिमेसम्म पुर्याइएको छ भने हेलिकप्टरमार्फत केबल ढुवानी गरी विद्युत् सेवा नियमित गराउने प्रयास भइरहेको छ। जलविद्युत् गृहभित्रको लेदो फाल्ने र सडक खुलाउने काम निरन्तर चलिरहेको यो जटिल उद्धार अभियानको प्राविधिक सहजीकरणका लागि नेपाल विद्युत् प्राधिकरणका पूर्वप्रमुख एवं पूर्वऊर्जामन्त्री कुलमान घिसिङ आफैँ कार्यक्षेत्रमा खटिएका छन्।
