काठमाडौँ। नेपाल इन्भेष्टमेन्ट मेगा बैंक (एनआईएमबी) का सञ्चालक समिति अध्यक्ष पृथ्वीबहादुर पाँडे धरौटीमा रिहा भएका छन्। स्मार्ट टेलिकमको धितो लिलामी प्रकरणमा थुनछेक बहसका लागि सोमबार जिल्ला अदालत काठमाडौँमा उपस्थित भएका उनलाई न्यायाधीश नवराज दुलालको इजलासले ४० लाख रुपैयाँ धरौटीमा छाड्न आदेश दिएको हो।
स्मार्ट टेलिकमको धितो लिलामीसम्बन्धी विवादमा गत साउन २७ गते अध्यक्ष पाँडेसहित २२ जनालाई प्रतिवादी बनाएर जिल्ला अदालत काठमाडौँमा मुद्दा दर्ता गरिएको थियो। उनीहरूविरुद्ध सङ्गठित अपराध र बैंक तथा वित्तीय संस्थासम्बन्धी कसुर (बाफिया) मा मुद्दा चलाइएको थियो। अदालतले मागेको ४० लाख रुपैयाँ धरौटी रकम सोमबार नै बुझाएपछि पाँडे रिहा भएका हुन्।
यसअघि सोही प्रकरणमा मुछिएका एनआईएमबी बैंकका प्रमुख कार्यकारी अधिकृत (सिइओ) ज्योतिप्रकाश पाण्डे ८० लाख रुपैयाँ धरौटी बुझाएर रिहा भइसकेका छन्।
