काठमाडौँ। साउदी अरेबियालाई ५ विकेटले पराजित गर्दै नेपाली राष्ट्रिय क्रिकेट टोलीले एसीसी प्रिमियर कपमा लगातार तेस्रो जित दर्ता गरेको छ। यस जितसँगै नेपाल एक खेल अगावै प्रतियोगिताको सेमिफाइनलमा प्रवेश गरेको छ। ३ खेलबाट ६ अंक जोड्दै नेपाल समूह ‘ए’ को शीर्ष स्थानमा उक्लिएको छ। नेपालले अब समूह चरणको अन्तिम खेलमा मंगलबार हङकङको सामना गर्नेछ।
मलेसियाको बायुमास ओभलमा साउदी अरेबियाले दिएको १ सय ९१ रनको लक्ष्य नेपालले ४१ ओभरमा ५ विकेट गुमाएर पूरा गर्यो। नेपालका लागि गुल्सन झा ४४ रन (३५ बल, ३ चौका, ३ छक्का) र कप्तान रोहित पौडेल २४ रनमा अविजित रहे। यस्तै ईशान पाण्डेले ४० रन तथा देव खनालले ३९ रनको योगदान दिए भने ओपनर अर्जुन कुमाल १५ र आशिफ शेख २० रनमा आउट भए।
यसअघि टस जितेर पहिले ब्याटिङ गरेको साउदी अरेबिया ४९.२ ओभरमा १ सय ९० रनमा अलआउट भएको थियो। साउदीका लागि ओपनर अब्दुल वाहिद गफरले सर्वाधिक ७७ रन बनाए। बलिङतर्फ नेपालका सन्दीप लामिछानेले १० ओभरमा २ मेडनसहित १९ रन खर्चेर ३ विकेट लिए। दीपेन्द्र सिंह ऐरीले पनि ३ विकेट लिए भने ललित राजवंशीले २ तथा शेर मल्ल र गुल्सन झाले १-१ विकेट हात पारे।
नेपालले यसअघि समूह चरणका पहिलो दुई खेलमा बहराइनलाई ७ विकेट र मलेसियालाई ६ विकेटले पराजित गरेको थियो।
