काठमाडौँ। भोटेकोसी बाढीपछिको खोज तथा उद्धार कार्यमा सघाउन अस्ट्रेलिया सरकारले १५ सदस्यीय विशेषज्ञ ‘डिजास्टर असिस्टेन्स रेस्पोन्स टिम’ नेपाल पठाउने भएको छ। नेपाल सरकारको औपचारिक अनुरोधपछि न्यु साउथ वेल्स र क्विन्सल्यान्डका फायर एन्ड रेस्क्यु टोलीसहितका ड्रोन अपरेटरहरू काठमाडौँ आउन लागेका हुन्।
उक्त टोलीले अत्याधुनिक ड्रोन प्रविधिमार्फत प्रभावित क्षेत्रको द्रूत नक्साङ्कन र तस्बिर संकलन गरी नेपाली उद्धारकर्ताहरूलाई खोजी कार्यमा प्रत्यक्ष सहयोग पुर्याउनेछ। यससँगै नेपालमा खटिने अस्ट्रेलियाली कर्मचारीको सङ्ख्या ३४ पुग्नेछ। यसअघि नै कन्सुलर, मानवीय सहायता, अस्ट्रेलियन फेडरल पुलिस र रक्षा मन्त्रालयका १९ जना कर्मचारी परिचालन भइसकेका छन्।
बाढीपछि नेपालमा रहेका ३८ जना अस्ट्रेलियाली नागरिक अझै सम्पर्कविहीन रहेको अस्ट्रेलिया सरकारले जनाएको छ। उनीहरूको खोजीका लागि अस्ट्रेलियाले नेपाल र चीनका सम्बन्धित निकायहरूसँग समन्वय गरिरहेको छ।
यसैबिच, अस्ट्रेलियाले नेपालका लागि आफ्नो मानवीय सहायता प्याकेज विस्तार गर्दै कुल १ करोड १० लाख अस्ट्रेलियन डलर पुर्याएको छ। अस्ट्रेलियाली नागरिकहरूले ‘इमर्जेन्सी एक्सन एलायन्स’मार्फत सङ्कलन गरेको ४० लाख डलरमा अस्ट्रेलिया सरकारले थप ३० लाख अस्ट्रेलियन डलर थप गरी विपद् पीडितका लागि आश्रय, खानेपानी, सरसफाइ, स्वास्थ्य सेवा तथा प्रभावित बालबालिकाका लागि अस्थायी सिकाइ केन्द्र निर्माणमा खर्च गर्ने जनाएको छ।
