काठमाडौँ। भोटेकोसी बाढीका कारण जलविद्युत् आयोजनाका सुरुङभित्र फसेका नागरिकहरूको खोज तथा उद्धारमा सघाउन साना लोडर र अत्यावश्यक उपकरणसहित अमेरिकी सेनाका दुई वटा विमान काठमाडौँ आइपुगेका छन्। नेपाल सरकारको विशेष अनुरोधमा अमेरिकी सेनाले राहत र उद्धार सामग्री लिएर नेपाल उडान भरेको हो।
काठमाडौँस्थित अमेरिकी दूतावासका अनुसार रसुवा बाढीपछिको उद्धार तथा राहत कार्यलाई तीव्र बनाउन ५ हजार थान विशिष्टीकृत उपकरण, ५ सय थान प्राथमिक उपचार (फर्स्ट एड) किट र ठूलो सङ्ख्यामा स्ट्रेचरहरू नेपाल ल्याइएको छ। यसअघि नै अमेरिकाले ३६ लाख अमेरिकी डलर बराबरको राहत सामग्री पठाइसकेको जानकारी दिँदै दूतावासले यो सहयोग नेपाल-अमेरिकाबिचको दीर्घकालीन साझेदारीको प्रतीक भएको जनाएको छ।
पर्याप्त प्रविधि, हेभी मेसिनरी र विशेषज्ञ उपकरणको अभावमा बाढी आएको ८ दिन बितिसक्दा पनि जलविद्युत् आयोजनाका सुरुङभित्र फसेका मानिसहरूको उद्धारमा कठिन चुनौती थपिएको छ। अमेरिकी सेनाले ल्याएका साना लोडर र उद्धार उपकरणहरूलाई तत्कालै प्रभावित क्षेत्रका टनेल तथा भग्नावशेष व्यवस्थापनमा खटाइने भएको छ।
