काठमाडौँ। लगातारको बाढीपहिरोका कारण देशका विभिन्न मुख्य राजमार्गहरू आज पनि पूर्ण रूपमा अवरुद्ध रहेका छन्। नेपाल प्रहरीका अनुसार जोखिम कायम रहेकाले केही सडक खण्डमा रातिको समयमा सवारी साधन सञ्चालनमा समेत रोक लगाइएको छ।
भदौ १० गतेको विनाशकारी भोटेकोसी बाढीपछि रसुवातर्फका सबैजसो मुख्य राजमार्गहरूसँगै त्रिशूली–मैलुङ–स्याफ्रुबेँसी सडक खण्ड पूर्ण रूपमा बन्द रहेको छ। यस्तै नुवाकोट जोड्ने टोखा–छहरे सडक, पासाङल्हामु राजमार्ग र विदुर–लाच्याङ सडक पनि बाढीपहिरोकै कारण अवरुद्ध बनेका छन्।
देशको प्रमुख लाइफलाइन मानिने पृथ्वी राजमार्गअन्तर्गत धादिङका विभिन्न स्थानमा त्रिशूली नदीले सडक कटान गर्दा यातायात सेवा ठप्प छ। प्रहरीका अनुसार बेनिघाट रोराङ गाउँपालिका–१ लाच्याङ डाँडा, वडा नं. ७ कृष्णभीर, वडा नं. १० ज्वाङ खोला र थाक्रे गाउँपालिका–२ कमेरेभीरमा नदीको तीव्र बहावले सडक बगाएपछि पृथ्वी राजमार्ग पूर्ण रूपमा ठप्प भएको हो।
यसका साथै बाढीपहिरोकै कारण लमजुङको बेँसीसहर–मनाङ सडक, मुगुको मुगु–गमगढी सडक र बैतडीको गोठालापानी–झुलाघाट सडक खण्डमा पनि सवारी आवागमन पूर्ण रूपमा ठप्प रहेको प्रहरीले जनाएको छ।
