काठमाडौँ। भोटेकोसी र त्रिशूली बाढीका कारण पहिचान हुन नसकेका शवहरूको डिएनए (DNA) परीक्षणका लागि विशेषज्ञ टोली र राहत सामग्री बोकेर चिनियाँ सेनाको विमान काठमाडौँ आइपुगेको छ। मङ्गलबार साँझ चिनियाँ सैन्य विमान त्रिभुवन अन्तर्राष्ट्रिय विमानस्थलमा अवतरण गरेको हो।
काठमाडौँस्थित चिनियाँ दूतावासका अनुसार उक्त विमानमा चीनका ५ जना डिएनए पहिचान विशेषज्ञहरू नेपाल आएका छन्। यसअघि चिनियाँ सेनाका दुई वटा कार्गो विमानमार्फत पहिलो खेपको सहयोग सामग्री पठाइसकेको चीनले मङ्गलबार साँझ दोस्रो खेप स्वरूप बाढी प्रभावितहरूका लागि थप राहत सामग्री र अत्याधुनिक प्राविधिक उपकरणहरू पठाएको हो।
नदीमा लामो समय डुबेका कारण चिन्नै नसकिने अवस्थामा रहेका शवहरूको पहिचान गर्न नेपाललाई सकस परिरहेका बेला चिनियाँ डिएनए विज्ञहरूको यो आगमनले शव व्यवस्थापन तथा आफन्तलाई बुझाउने प्रक्रियामा ठूलो सहयोग पुग्ने विश्वास लिइएको छ।
