देशकै प्रमुख ‘लाइफलाइन’ मानिने पृथ्वी राजमार्गअन्तर्गत धादिङको कृष्णभीरमा पहिरोले अवरुद्ध भएको सडक पुनः सञ्चालनमा ल्याउन अझै कम्तीमा १० देखि १५ दिन लाग्ने भएको छ। भोटेकोसी बाढीका कारण त्रिशूली नदीमा पानीको बहाव अत्यधिक बढेपछि सडकको तल्लो भाग कटान भई माथिल्लो भूभागमा चिरा परेर ठूलो पहिरो खसेको हो।
सडक विभागले प्राविधिक तथा भौगर्भिक विज्ञसहितको टोली कृष्णभीरमा परिचालन गरी सडक खोल्ने तयारी तीव्र पारेको छ। विभागका सहसचिव चुणाराज ढकालका अनुसार राजमार्गलाई उच्च प्राथमिकतामा राखेर तत्कालका लागि पारिपट्टिको वैकल्पिक मार्ग प्रयोग गर्ने र यता मुख्य राजमार्ग १० देखि १५ दिनभित्र खुलाउने गरी काम अघि बढाइएको छ। आगामी दिनमा नदी करिडोरमा बन्ने सडकको उचाइ बढाउने, अग्ला पुल तथा सुरुङ निर्माण गरी विपद्-प्रतिरोधी पूर्वाधार बनाउने नीति आवश्यक रहेको उनले बताए।
भू-प्राविधिक विज्ञ मधुसुदन आचार्यका अनुसार कृष्णभीरको पहिरो पुरानै ‘स्लोप फेलियर’ भएको क्षेत्रमा दोहोरिएको हो। ड्रोन अध्ययनका क्रममा नदीको तल्लो भागमा बेडरक भेटिएकाले कटान केही थामिएको अनुमान गरिएको छ। हाललाई माथिल्लो भागको जोखिमयुक्त माटो र भित्तो काटेर करिब सय मिटर लम्बाइको प्रभावित क्षेत्रमा ‘सिङ्गल लेन डाइभर्सन’ निर्माण गरी बाटो खुलाउने सम्भावना रहेको छ।
त्यसैगरी, नदी कटान नियन्त्रणका लागि जिओब्याग, ग्याभिन नेट तथा बोल्डर र्यापिङ प्रविधि प्रयोग गरिनेछ। ३-४ वटा ठूला मेसिन परिचालन गरेर तीव्र गतिमा काम गर्दा १५ दिनभित्र यातायात सञ्चालन गर्न सकिने विभागले जनाएको छ।
