रसुवाको भोटेकोसी बाढीमा परी ज्यान गुमाएकामध्ये पोखरा ल्याइएका पहिचान हुन नसकेका ७८ वटा शवको मङ्गलबार सामूहिक रूपमा जमिनमुनि व्यवस्थापन गरिएको छ। जिल्ला विपद् व्यवस्थापन समिति कास्कीले पोखरा महानगरपालिका–१६ जौवारीस्थित सिँचाइ विभागको स्वामित्वमा रहेको गाँडतरा क्षेत्रमा ती शवहरूको व्यवस्थापन गरेको हो।
कास्कीका प्रमुख जिल्ला अधिकारी कुमानसिंह गुरुङका अनुसार पोस्टमार्टम, डिएनए (DNA) नमुना सङ्कलन तथा पहिचानका लागि आवश्यक पर्ने सम्पूर्ण कानुनी र वैज्ञानिक सबुतहरू सुरक्षित राखेर मात्र शव व्यवस्थापन गरिएको हो। भविष्यमा आफन्तले दाबी गर्न आएमा र डिएनए परीक्षण गर्दा मेल खाएमा शव पुनः पहिचान गरी बुझाउन मिल्ने गरी प्रविधिपूर्वक जमिनमुनि राखिएको छ।
कास्कीका प्रहरी प्रमुख एसपी नवीन कार्कीले पहिचान नभएका शवहरूलाई ‘पहिचान हुन नसकेका तथा बेवारिसे शव व्यवस्थापन निर्देशिका’ अनुसार नै व्यवस्थापन गरिएको जानकारी दिए। भोटेकोसी बाढीपछि पोखरा ल्याइएका कुल १०२ वटा शवमध्ये सोमबारसम्म १६ वटा शवको मात्र पहिचान भई आफन्तलाई बुझाइएको थियो।
