काठमाडौं, १३ भदौं । तीन दिन अघि चीननेपाल सीमा नजिकका क्षेत्रमा आएको आकस्मिक बाढीपछि ‘ईशा फाउन्डेसन’ का ७७ जना तीर्थयात्रीहरूको समूह सम्पर्कविहीन भएको छ।
भारतीय आध्यात्मिक गुरु जग्गी वासुदेव (सद्गुरु) द्वारा स्थापित संस्था ‘ईशा फाउन्डेसन’ को नेतृत्वमा रहेको ७७ सदस्यीय यो समूह हाल सम्पर्कविहीन अवस्थामा छ।
समूह संयोजक माता गम्भीरीले बताए अनुसार सद्गुरु सहयोग पुर्याउनका लागि विपद्बाट प्रभावित ‘ग्राउन्ड जिरो’ अर्थात मुख्य प्रभावित क्षेत्र मानिने ग्याइरोङको भ्रमण गर्न चाहन्थे तर उनले स्थानिय चिनियाँ सरकारले अझै अनुमति दिएको छैन ।
उनले उक्त समूहमा १९ देशका मानिसहरू समावेश रहेको र हरेक प्रकारको सहयोग जुटाउन भारत, चीन तथा नेपालस्थित सबै दूतावासहरूसँग सम्पर्क गरिएको बताए। उनले जानकारी र सहयोगका लागि भारत र नेपालका विभिन्न कार्यालय तथा मन्त्रालयहरूसँग पनि सम्पर्क गरिएको जानकारी दिए। माता गम्भीरीले बताए अनुसार विगत दुई दिनदेखि ईशा फाउन्डेसनका हराइरहेका ७७ जना तीर्थयात्रीहरूबारे कुनै जानकारी प्राप्त भएको छैन । उद्धार टोलीहरू घटनास्थलमा खटिएका भए पनि हालसम्म कुनै खबर आएको छैन।
उनले थप बताए कि ७७ परिवारहरू आतुरताका साथ जवाफको प्रतीक्षा गरिरहेका छन्। उनीहरूका लागि यो निकै कठिन र भावनात्मक समय हो। ईशा फाउन्डेसनले हरेक सिजनमा कैयौं पटक कैलाश मानसरोवर यात्राको आयोजना गरिरहेका हुन्छन् । यात्रीहरूको समूह काठमाडौंबाट नेपाल हुँदै तिब्बत पुग्छ र यात्राका क्रममा पैदल यात्रा पनि गर्छ।
गत बुधबार आफ्नो आधिकारिक फेसबुक पेजमा पोस्ट गरिएको सन्देशमा सद्गुरुले नेपाल फर्कने क्रममा आफ्नो कैलाश यात्राको एउटा समूह अचानक आएको बाढीका कारण अलपत्र परेको जानकारी दिएका थिए । बाढी आउँदा उक्त समूह ग्याइरोङस्थित अध्यागमन कार्यालयमा रहेका थिए ।
प्राप्त विवरणहरूका अनुसार बाढीको पानीले उक्त भवन र सहरको ठूलो भाग डुबानमा पारेको थियो। उनले नेपालको टिमुरेमा तीनजना स्वयंसेवकहरू अलपत्र परेको पनि उल्लेख गरे।
हराएका तीर्थयात्रीहरूमा अमेरिकाका २२, क्यानडाका १२, अस्ट्रेलियाका ११, बेलायतका ९, जर्मनीका ४, फ्रान्स र नेपालका ३–३ जना, नेदरल्यान्ड्स, न्युजिल्यान्ड, सिंगापुर र स्पेनका २–२ जना तथा फिनल्यान्ड, हंगेरी, इजरायल, लिथुआनिया, फिलिपिन्स, पोर्चुगल, रुस र दक्षिण अफ्रिकाका १–१ जना समावेश छन्।
