रसुवा । नेपाल–चीन सीमावर्ती क्षेत्र तिब्बततर्फ पहिरोका कारण थुनिएको कृत्रिम ताल (ड्याम) पुनः फुटेपछि नेपालको नदी तटीय क्षेत्रमा उच्च सतर्कता अपनाइएको छ। चीनको जिरोङ नाकाभन्दा माथिल्लो क्षेत्रमा बनेको ड्याम फुटेर पानीको ठूलो बहाव तलतिर सोझिएपछि भोटेकोशी र त्रिशूली नदी आसपासका तल्लो तटीय क्षेत्रमा बाढीको गम्भीर खतरा उत्पन्न भएको छ।
स्थिति जोखिमपूर्ण बनेपछि नेपाल प्रहरीले आपत्कालीन सूचना जारी गर्दै नदी किनार तथा आसपासका बासिन्दाहरूलाई तत्काल सुरक्षित स्थानतर्फ जान अनुरोध गरेको छ।
रसुवामा वस्तुस्थिति नियन्त्रण तथा समन्वयका लागि खटिनुभएका एसएसपी दीप शमशेर जबराका अनुसार ड्याम फुटेको खबर प्राप्त हुनासाथ उद्धार तथा राहत कार्यमा खटिएका सम्पूर्ण सुरक्षाकर्मी, उद्धारकर्मी र सर्वसाधारणलाई तत्कालका लागि कार्य रोकेर सुरक्षित स्थानतर्फ जान निर्देशन दिइएको छ। Wednesday को भीषण पहिरोपछि जम्मा भएको पानी ओभरफ्लो भइरहेकै अवस्थामा ड्याम पुनः फुटेकाले भोटेकोशी र त्रिशूली नदीमा भीषण आकस्मिक बाढी आउने खतरा बढेको छ।
