काठमाडौँ, ११ भदौः परराष्ट्रमन्त्री शिशिर खनाललाई बेलायतका विदेश, राष्ट्रमण्डल तथा विकास मामिलामन्त्री मिलिब्यान्ड एड मिलिब्यान्डले आज टेलिफोन गर्नुभएको छ ।
टेलिफोन वार्ताका क्रममा विदेशमन्त्री मिलिब्यान्डले बुधबार गएको विनाशकारी बाढीका कारण भएको जनधनको क्षतिप्रति गहिरो दुःख व्यक्त गर्दै शोकसन्तप्त परिवारप्रति समवेदना प्रकट गर्नुभयो । उहाँले विपद्को यस कठिन घडीमा बेलायत सरकार र जनताको नेपाल तथा नेपाली जनताप्रति ऐक्यबद्धता रहेको बताउनुभयो ।
विदेशमन्त्री मिलिब्यान्डले बाढीबाट उत्पन्न परिस्थितिसँग जुध्न नेपाललाई सहयोग गर्ने बेलायत सरकारको दृढ समर्थन रहेको बताउँदै जारी खोज तथा उद्धार कार्यबारे जानकारी लिनुभयो । साथै, बाढीपछि सम्पर्कविहीन रहेका बेलायती नागरिकको खोजी तथा उद्धार प्रयासबारे पनि उहाँले चासो राख्नुभयो ।
सो अवसरमा परराष्ट्रमन्त्री खनालले नेपाल सरकारले सञ्चालन गरिरहेको खोज तथा उद्धार कार्यबारे जानकारी गराउँदै कठिन परिस्थितिमा नेपाललाई सहयोग गर्ने बेलायत सरकारको तत्परताप्रति धन्यवाद व्यक्त गर्नुभयो ।
