नेपाल उद्योग वाणिज्य महासंघ र अन्तरराष्ट्रिय श्रम सङ्गठन (आईएलओ) बिच श्रम बजार सुधार, रोजगारी सृजना, सीप विकास र उद्यमशीलताका क्षेत्रमा सहकार्यलाई थप प्रभावकारी बनाउने सहमति भएको छ।
महासंघका अध्यक्ष अञ्जन श्रेष्ठ र आईएलओ नेपालका देशीय निर्देशक नुमान ओजकानबिच टेकूस्थित महासंघ सचिवालयमा भएको भेटवार्तामा दीर्घकालीन सहकार्यलाई परिणाममुखी बनाउने विषयमा गहन छलफल भएको हो। भेटका क्रममा अध्यक्ष श्रेष्ठले युवाको वैदेशिक पलायन, सीप र रोजगारीबिचको असन्तुलन तथा न्यून उत्पादकत्व नेपालको प्रमुख चुनौती रहेको औँल्याउँदै निजी क्षेत्रलाई गुणस्तरीय रोजगारी सृजनाको वातावरण बनाउन आग्रह गर्नुभयो।
जवाफमा आईएलओका देशीय निर्देशक ओजकानले व्यवसाय वृद्धि, रोजगारी सृजना, जलवायु परिवर्तन र श्रम बजारका नयाँ चुनौती सम्बोधन गर्न महासंघसँगको सहकार्य निरन्तर रहने प्रतिबद्धता जनाउनुभयो। सो अवसरमा महासंघका उपाध्यक्ष एवं रोजगारदाता परिषद्का सभापति प्रवलजङ्ग पाण्डेले श्रम कानुन सुधार प्रक्रियालाई समावेशी, पारदर्शी र त्रिपक्षीय संवादमा आधारित बनाउनुपर्नेमा जोड दिनुभयो।
