भोजपुरको टेम्केमैयुङ गाउँपालिका–९ मा करिब १० करोड रुपैयाँको लागतमा अत्याधुनिक कृषि उत्पादन संकलन तथा बिक्री केन्द्र निर्माण हुने भएको छ। परियोजना निर्माणका लागि नेपाल सरकार, भारतीय दूतावास र टेम्केमैयुङ गाउँपालिकाबीच काठमाडौँमा औपचारिक समझदारीपत्रमा हस्ताक्षर भएको छ।
सम्झौताअनुसार कुल ९ करोड ८८ लाख ६७ हजार ७८५ रुपैयाँ ९० पैसा लागत रहने यस परियोजनामा भारत सरकारको ९५ प्रतिशत अर्थात् करिब ९ करोड ३९ लाख २४ हजार रुपैयाँ अनुदान रहनेछ भने बाँकी ५ प्रतिशत अर्थात् करिब ४९ लाख ४३ हजार रुपैयाँ गाउँपालिकाले व्यहोर्नेछ। समझदारीपत्रमा नेपाल सरकारका उपसचिव होमनाथ काफ्ले, भारतीय दूतावासका विकास साझेदारी काउन्सिलर अविनाश कुमार सिंह र टेम्केमैयुङ गाउँपालिकाका अध्यक्ष सरोज बस्नेतले हस्ताक्षर गर्नुभएको हो।
१५ महिनाभित्र निर्माण सम्पन्न गर्ने लक्ष्य राखिएको यस आयोजनाको निर्माण तथा व्यवस्थापनको जिम्मेवारी गाउँपालिका स्वयंले लिनेछ। कार्यप्रगतिका आधारमा ६ किस्तामा अनुदान रकम निकासा हुने र परियोजनाको गुणस्तर कायम राख्न नेपाल सरकार, भारतीय दूतावास, जिल्ला समन्वय समिति र गाउँपालिकाका प्रतिनिधिहरू सम्मिलित अनुगमन समिति समेत गठन गरिनेछ।
यो केन्द्र निर्माणपछि स्थानीय कृषि उत्पादनको संकलन, बजारीकरण र बिक्री प्रक्रिया व्यवस्थित भई कृषकहरू सिधै बजारसँग जोडिनेछन्। यस आयोजनाबाट टेम्केमैयुङ गाउँपालिकाका साथै समग्र भोजपुर र छिमेकी जिल्ला खोटाङका कृषकहरू समेत प्रत्यक्ष रूपमा लाभान्वित हुने अपेक्षा गरिएको छ।
