प्रतिनिधि सभाको बैठकलाई थप मर्यादित र अनुशासित बनाउन अबदेखि सांसदहरूले बैठक कक्षभित्र कालो चस्मा (Sun Glasses) लगाउन नपाउने भएका छन्।

बुधबार बसेको कार्यव्यवस्था परामर्श समितिको बैठकमा सभामुख डोलप्रसाद (डिपी) अर्यालले सांसदहरूले बैठकमा कालो चस्मा लगाउने गरेको विषयमा पटक-पटक प्रश्न उठेको भन्दै अबदेखि कालो चस्मा लगाएर नआउन निर्देशन दिएका हुन्। सभामुख अर्यालले यो सन्देश आ-आफ्नो दलका सांसदहरूसम्म तत्काल पुर्‍याउन प्रमुख सचेतक र सचेतकहरूलाई ताकेता गरेका छन्।

संसद बैठकमा प्रधानमन्त्री बालेन शाह, गृहमन्त्री सुधन गुरूङ, पूर्वाधार मन्त्री सुनिल लम्सालसहित केही सांसदहरू नियमित रूपमा कालो चस्मा लगाएर सहभागी हुँदै आएका थिए।

प्रधानमन्त्री र मन्त्रीहरूलाई पनि समान नियम लागू गर्न माग

बैठकमा सहभागी प्रमुख प्रतिपक्षी दल नेपाली कांग्रेसकी प्रमुख सचेतक बासना थापाले सभामुखको प्रस्तावको समर्थन गर्दै यो नियम केवल सांसदलाई मात्र नभई प्रधानमन्त्री र मन्त्रीहरूलाई पनि समान रूपमा लागू हुनुपर्ने धारणा राखिन्।

“प्रधानमन्त्रीज्यू र मन्त्रीज्यूहरू नै कालो चस्मा लगाएर संसदमा उपस्थित हुने गर्नुभएको छ, उहाँहरूलाई पनि सभामुखज्यूले नै भन्नुपर्‍यो। हामी हाम्रा सांसदहरूलाई अबदेखि कालो चस्मा नलगाउनुस् भनेर खबर गरौँला,” प्रमुख सचेतक थापाले भनिन्।

यसपछि सभामुख अर्यालले सत्तारूढ दल राष्ट्रिय स्वतन्त्र पार्टी (रास्वपा) का सचेतक प्रकाशचन्द्र परियारलाई यो विषय सरकार (प्रधानमन्त्री तथा मन्त्रीहरू) सम्म पुर्‍याउन आग्रह गरेका थिए।

मर्यादित पोसाक, राष्ट्रिय लोगो र लबी गफमा कडाइ

कार्यव्यवस्था परामर्श समितिमा कालो चस्माका साथै सांसदहरूको समग्र अनुशासन र मर्यादाका विषयमा पनि गम्भीर छलफल भएको छ।

मर्यादित पोसाक र लोगो: रास्वपा सचेतक प्रकाशचन्द्र परियारका अनुसार सांसदहरू अनिवार्य रूपमा प्रतिनिधि सभाको प्रतीक चिह्न (लोगो) लगाएर आउनुपर्ने र मर्यादित पोसाक पहिरिनुपर्ने विषयमा कुरा उठेको छ।
लबीमा धेरै बेर बस्न रोक: बैठक चलिरहेका बेला सांसदहरू बैठक कक्षबाहिरको लबीमा लामो समयसम्म उभिएर गफगाफ गर्ने परिपाटीप्रति सभामुखले असन्तुष्टि जनाएका छन्।
अन्तर्राष्ट्रिय अभ्यास: नेकपाका प्रमुख सचेतक युवराज दुलालले विश्वका अन्य संसदहरूमा पनि यस्तो कालो चस्मा लगाउने परिपाटी नरहेको र कोट तथा औपचारिक पोसाक लगाएर संसदको गरिमा कायम राख्न सभामुखले ध्यानाकर्षण गराएको बताए।

के छ प्रतिनिधि सभा नियमावलीको व्यवस्था?

प्रतिनिधि सभा नियमावली अनुसार सांसदहरूको पोसाक कार्यव्यवस्था परामर्श समितिको परामर्शमा सभामुखले तोकेबमोजिम हुने व्यवस्था छ। पोसाक तोक्दा औपचारिक, मौलिक संस्कृति, परम्परा वा पहिचान झल्किने मर्यादित भेषभूषामा ध्यान दिनुपर्ने उल्लेख छ।

सभामुखको नयाँ कडा निर्देशनपछि आगामी संसद बैठकमा प्रधानमन्त्री बालेन शाह, मन्त्रीहरू र सांसदहरू कसरी प्रस्तुत हुन्छन् भन्नेबारे चासो बढेको छ।

यसमा तपाइको प्रतिक्रिया

सम्बन्धित समाचार