राष्ट्रिय स्वतन्त्र पार्टी (रास्वपा) का सुदूरपश्चिम प्रदेशबाट प्रतिनिधि सभामा प्रतिनिधित्व गर्ने सांसदहरूले प्रधानमन्त्री वालेन्द्र शाहसँग भेटवार्ता गरेका छन्।
मंगलबार प्रधानमन्त्री तथा मन्त्रिपरिषद्को कार्यालय (सिंहदरबार) मा भएको भेटमा सांसदहरूले सुदूरपश्चिम प्रदेशका विद्यमान समस्या, विकास निर्माणका योजना तथा सम्भावनाहरूबारे प्रधानमन्त्री शाहको ध्यानाकर्षण गराएका हुन्।
प्रधानमन्त्रीको सचिवालयका अनुसार भेटमा सुदूरपश्चिमको समग्र राजनीतिक अवस्था र आफ्ना निर्वाचन क्षेत्रका स्थानीय एजेन्डाहरूबारे विस्तृत छलफल भएको छ।
विकास आयोजना र स्थानीय समस्याबारे छलफल
भेटका क्रममा सांसदहरूले सुदूरपश्चिम प्रदेशको समृद्धिसँग जोडिएका राष्ट्रिय तथा स्थानीय गौरवका आयोजनाहरू शीघ्र अघि बढाउन माग गरेका छन्। उनीहरूले प्रधानमन्त्री शाहसमक्ष पेस गरेका मुख्य विषयहरू यस प्रकार छन्:
-
स्वास्थ्य र शिक्षा: सहिद दशरथचन्द स्वास्थ्य विज्ञान विश्वविद्यालय शीघ्र सञ्चालन गर्नुपर्ने।
-
पूर्वाधार र जलविद्युत्: बहुचर्चित पञ्चेश्वर बहुउद्देश्यीय आयोजना, पश्चिम सेती जलविद्युत् आयोजना र धनगढी-खुटिया-दिपायल फास्ट ट्र्याक निर्माण।
-
कृषि र विपद् व्यवस्थापन: किसानका लागि धान खरिद-बिक्रीको सहजीकरण, कैलाली-कञ्चनपुरमा छाडा चौपाया व्यवस्थापन, तटबन्ध निर्माण र दोधारा-चाँदनी क्षेत्रमा भइरहेको नदी कटान नियन्त्रण।
-
यातायात र अन्य: हुलाकी सडक विस्तार, विद्युतीकरण, सडक दुर्घटना न्यूनीकरण, भन्सारसम्बन्धी समस्या र आरक्षपीडितका गुनासाहरू।
प्रतिनिधि मण्डलमा को-को थिए?
सुदूरपश्चिमको विकास र समृद्धिको एजेन्डा बोकेर प्रधानमन्त्री भेट्न पुगेको रास्वपाको प्रतिनिधि मण्डलमा सांसदहरू ताराप्रसाद जोशी, खेमराज कोइराला, हरिमोहन भण्डारी, जनकसिंह धामी, कोमल ज्ञवाली, ज्ञानेन्द्र महता, जगत जोशी र केपी खनाल लगायतको सहभागिता रहेको थियो।
