नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले देशको राष्ट्रिय स्वाधीनतामाथि गम्भीर सङ्कट आएको दाबी गर्नुभएको छ। नरबहादुर कर्माचार्यको १३ औँ स्मृति दिवसका अवसरमा पार्टी केन्द्रीय कार्यालय पेरिसडाँडामा आयोजित कार्यक्रमलाई सम्बोधन गर्दै संयोजक दाहालले अहिले कम्युनिस्ट आन्दोलनले धक्का खाएको र यसलाई पुनः एकताबद्ध एवम् पुनर्जीवित गर्दै देशको नेतृत्व लिने सङ्कल्प गर्नुपर्ने बेला आएको बताउनुभयो।
देशमा देखिएको निरङ्कुश प्रवृत्ति र कम्युनिस्ट आन्दोलनमाथि आइपरेको असाधारण अप्ठ्यारो परिस्थितिको सामना गर्न सबै क्रान्तिकारी शक्तिहरू एकजुट हुनुपर्नेमा उहाँले जोड दिनुभयो। राष्ट्रिय स्वाधीनताको रक्षा र निरङ्कुश प्रवृत्तिका विरुद्ध पुनः एकपटक सङ्घर्षमा उत्रिनुपर्ने अवस्था सिर्जना भएको जिकिर गर्दै प्रचण्डले कम्युनिस्ट आन्दोलनलाई एकताबद्ध बनाएर अघि बढ्न आह्वान गर्नुभयो।
