काठमाडौँ, २५ असारः राष्ट्रियसभाको आजको बैठकबाट ‘स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३’ सर्वसम्मतिले पारित भएको छ ।
बैठकमा स्वास्थ्य तथा खाद्य स्वच्छतामन्त्री निशा मेहताले सो विधेयक पारित गरियोस् भन्ने प्रस्ताव प्रस्तुत गर्नुभएको थियो । छलफलमा सदस्य वासुदेव घिमिरेले भाग लिँदै आफूहरूका संशोधनलाई स्वीकार गरेकामा सरकारलाई धन्यवाद दिनुभयो ।
अध्यादेशलाई विस्थापन गर्न ल्याइएको सो विधेयक प्रतिनिधिसभाबाट सन्देशसहित प्राप्त भएको हो । सभाले विधायन व्यवस्थापन समितिको संशोधनसहितको प्रतिवेदनलाई स्वीकार गरेको छ । सो विधेयक अब प्रतिनिधिसभामा फिर्ता जानेछ ।
सभाका अध्यक्ष नारायणप्रसाद दाहालले समय सीमाको चापका बीच छोटो अवधिमा छलफलपश्चात् आजै अध्यादेशलाई प्रतिस्थापनसम्बन्धी चार र बजेटसम्बन्धी आश्रित दुई विधेयक पारित गर्न सकिएकामा सम्बन्धित मन्त्री, समितिका सदस्य र सबै सदस्यहरूप्रति आभार व्यक्त गर्नुभयो । सभाको अर्काे बैठक यही असार २६ गते शुक्रबार १ः१५ बजे बस्नेछ ।
