काठमाडौँ। सन् २०१० को विश्वविजेता स्पेन फिफा विश्वकपको आफ्नो पहिलो खेलमा बराबरीमा रोकिएको छ। क्यानडा, अमेरिका र मेक्सिकोको संयुक्त आयोजनामा जारी विश्वकप अन्तर्गत समूह ‘एच’ को सोमबार राति सम्पन्न खेलमा स्पेन र नवप्रवेशी टोली क्याबो भर्डेले ०–० को गोलरहित बराबरी खेलेका हुन्।
प्रतिस्पर्धात्मक खेलमा क्याबो भर्डेले बलियो टोली स्पेनलाई बराबरीमा रोक्दै अंक बाँड्न सफल भएको छ। खेल अवधिभर स्पेनले बलमाथि अधिकांश नियन्त्रण कायम गरे तापनि गोल गर्न भने सकेन।
खेलमा स्पेनको पक्षमा ७४ प्रतिशत बल पोसेसन रहँदा क्याबो भर्डेसँग २६ प्रतिशत मात्र सीमित थियो। स्पेनले विपक्षी टोलीको विरुद्ध कुल २३ शट्स प्रहार गरेकोमा ८ वटा प्रहार निशानामा (On Target) रहेका थिए। अर्कोतर्फ, क्याबो भर्डेले कुल ६ शट्स प्रहार गरेकोमा १ शट मात्र निशानामा परेको थियो।
खेलका दौरान स्पेनले ११ वटा कर्नर प्राप्त गरे पनि त्यसलाई सदुपयोग गर्न सकेन।
खेलको दोस्रो हाफमा स्पेनले आक्रामक रणनीतिका साथ लमिन यमाललाई मैदानमा प्रवेश गराएको थियो। यमालको आगमनपछि स्पेनले खेलमा केही अवसरहरू सिर्जना गरे तापनि क्याबो भर्डेको बलियो रक्षापंक्ति (Defense) तोड्न असफल रह्यो। परिणामस्वरुप, दुवै टोली निर्धारित समयसम्म गोलरहित स्थितिमै रहे।
यस खेलको नतिजासँगै समूह ‘एच’ मा रहेका स्पेन र क्याबो भर्डेले समान १–१ अंक जोडेका छन्। पहिलो खेल समाप्तिसँगै दुवै टोली समूहको पहिलो र दोस्रो स्थानमा रहेका छन्।
