काठमाडौँ । काठमाडौँ उपत्यकाका भूमिहीन दलित, सुकुमवासी र अव्यवस्थित बसोबासीहरूले आफ्नो स्थायी पुनःस्थापना र जमिनको स्वामित्व माग गर्दै सरकारलाई ज्ञापनपत्र बुझाएका छन्।
थापाथली, गैरिगाउँ, शान्तिनगर र जडिबुटी लगायतका क्षेत्रबाट हटाई हाल कीर्तिपुरस्थित ‘राधास्वामी सत्संग होल्डिङ सेन्टर’ मा राखिएका पीडितहरूले संयुक्त रूपमा प्रधानमन्त्री, गृहमन्त्री र भूमि व्यवस्था, सहकारी तथा गरिबी निवारण मन्त्रीलाई सम्बोधन गर्दै ध्यानाकर्षण गराएका हुन्।
विकल्प र क्षतिपूर्ति बिना विस्थापित गरेको आरोप
पीडितहरूले उचित विकल्प, कानुनी प्रक्रिया र कुनै क्षतिपूर्ति बिना नै राज्यले आफूहरूलाई जबरजस्ती थातथलोबाट विस्थापित गरेको आरोप लगाएका छन्। तीन-चार पुस्तादेखि बस्दै आएको बस्ती भत्काएर होल्डिङ सेन्टरमा ल्याइएका कारण आफूहरूको रोजगारी, पशुपालन र बालबालिकाको शिक्षा पूर्ण रूपमा खोसिएको उनीहरूको गुनासो छ।
होल्डिङ सेन्टरमा चरम अभाव: उपचार नपाएर एकको मृत्यु, बालबालिका आइसियुमा
ज्ञापनपत्रमा होल्डिङ सेन्टरभित्रको कश्टकर जीवनशैली र मानवीय संकटबारे गम्भीर खुलासा गरिएको छ:
स्वास्थ्य र पोषणको अभाव: सेन्टरमा आधारभूत स्वास्थ्य सेवा, औषधोपचार र पोषणयुक्त खानाको चरम अभाव रहेको छ।
उपचार नपाउँदा ज्यान गयो: समयमा आवश्यक औषधोपचार नपाएकै कारण सेन्टरमा आश्रित भेषराज परियारले ज्यान गुमाउनु परेको पीडितहरूले उल्लेख गरेका छन्।
बालबालिका जोखिममा: हाल सेन्टरमा रहेका अन्य कयौँ बिरामी बालबालिकाहरू स्वास्थ्य अवस्था जटिल बनेपछि अस्पतालको सघन उपचार कक्ष (आइसियु) मा छटपटाइरहेको बताइएको छ।
पीडितहरूले राज्यको यस्तो गैरजिम्मेवारपूर्ण कदमले नागरिकको बाँच्न पाउने हकमाथि नै प्रहार गरेको भन्दै तत्काल दिगो व्यवस्थापन र भूमि अधिकार सुनिश्चित गर्न सरकारसँग जोडदार माग गरेका छन्।
