काठमाडौँ । प्रधानमन्त्री बालेन्द्र शाह (बालेन) ले मन्त्रिपरिषद्को बैठक बोलाएका छन् । मंगलबार दिउँसो १२ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा बस्ने गरी प्रधानमन्त्री शाहले बैठक आह्वान गरेका हुन् ।
बैठकका औपचारिक एजेण्डाहरू भने हालसम्म सार्वजनिक गरिएको छैन । तर, पछिल्लो समय विकसित राजनीतिक घटनाक्रम र संसदमा उत्पन्न गतिरोधबारे बैठकमा छलफल हुन सक्ने अनुमान गरिएको छ ।
गत आइतबार प्रतिनिधिसभामा विपक्षी दलका सांसदहरूले सोधेका प्रश्नको जवाफ दिने क्रममा प्रधानमन्त्री शाहले ‘नेपालले पनि भारतको जमिन मिचेको छ’ भनी दिएको अभिव्यक्तिलाई लिएर यतिबेला चौतर्फी विरोध भइरहेको छ । प्रधानमन्त्रीको उक्त विवादित अभिव्यक्तिका कारण संघीय संसद्का बैठकहरू समेत प्रभावित हुँदै आएका छन् ।
यस्तो दबाबपूर्ण परिस्थिति र संसदमा जारी गतिरोधका बीच बस्न लागेको यस मन्त्रिपरिषद् बैठकलाई राजनीतिक वृत्तमा चासोका साथ हेरिएको छ ।
