काठमाडौँ, १८ जेठ
प्रधानमन्त्री बालेन्द्र शाहले सीमा विवादका विषयमा दिएको विवादास्पद अभिव्यक्तिको रापताप प्रतिनिधिसभा हुँदै राष्ट्रिय सभामा पनि सल्किएको छ। प्रधानमन्त्रीको उक्त अभिव्यक्तिको विरोधमा सांसदहरूले बैठक कक्षमै नाराबाजी र विरोध गरेपछि राष्ट्रिय सभाको बैठक स्थगित भएको छ।
सोमबार बसेको बैठक सुरु हुनासाथ विपक्षी दलका सांसदहरूले प्रधानमन्त्री शाहको संसद्मा व्यक्त भनाइप्रति कडा आपत्ति जनाउँदै रोष्ट्रम घेराउ र नाराबाजी सुरु गरेका थिए। सांसदहरूको लगातारको विरोध र गतिरोधका कारण बैठक अगाडि बढाउन नसकेपछि राष्ट्रिय सभाका अध्यक्ष नारायणप्रसाद दाहालले २० मिनेटका लागि बैठक स्थगित भएको घोषणा गर्नुभएको छ।
आइतबार प्रतिनिधिसभाको प्रश्नोत्तर कार्यक्रममा प्रधानमन्त्री बालेनले नेपाल-भारत सीमा विवाद र कूटनीतिक संवादका क्रममा नेपालले पनि सीमा मिचेको आशयको अभिव्यक्ति दिएका थिए। सोही विषयलाई लिएर आज राष्ट्रिय सभामा पनि सांसदहरूले देशको अखण्डता र सीमा जस्तो संवेदनशील विषयमा प्रधानमन्त्री गैरजिम्मेवार बनेको भन्दै आक्रोश पोखेका हुन्।
यसअघि सिंहदरबारमा बसेको प्रतिपक्षी दलहरूको साझा बैठकले प्रतिनिधिसभामा बेल घेर्ने निर्णय गरिसकेको अवस्थामा राष्ट्रिय सभामा पनि सोही मुद्दालाई लिएर बैठक अवरुद्ध भएपछि संसद्का दुवै सदन पूर्ण रूपमा प्रभावित बन्न पुगेका छन्।
