काठमाडौँ, १६ जेठ । नेपाली राष्ट्रिय महिला क्रिकेट टोली घरेलु टोली मलेसियासँग पराजित भएसँगै एसियन गेम्समा सहजै छनोट हुने पहिलो अवसरबाट विमुख भएको छ।
मलेसियामा जारी एसियन गेम्स महिला क्रिकेट छनोटको सेमिफाइनलमा शनिबार नेपाल मलेसियासँग दुई विकेटले पराजित भएको हो। यो पराजयसँगै नेपालले फाइनल पुग्दै एसियाली खेलकुदमा स्थान बनाउने सुनौलो मौका गुमाएको छ। प्रतियोगिताको फाइनलमा पुगेका मलेसिया र थाइल्यान्ड भने एसियन गेम्सका लागि छनोट भइसकेका छन्।
नेपालले अब एसियाली खेलकुदको टिकट काट्नका लागि तेस्रो स्थानको खेल जित्नैपर्ने दबाब छ। तेस्रो स्थानका लागि नेपालले आइतबार चीनको सामना गर्नेछ। शनिबारै भएको पहिलो सेमिफाइनलमा चीन थाइल्यान्डसँग ८३ रनले पराजित भएको थियो। यसअघि समूह चरणमा भएको भेटमा नेपालले चीनलाई १९ रनले हराएकाले आइतबारको खेलमा नेपाललाई केही मनोवैज्ञानिक लाभ हुने देखिन्छ।
खेलको संक्षिप्त विवरण:
बायोमास ओभलमा टस जितेर ब्याटिङ रोजेको नेपालले निर्धारित २० ओभरमा ६ विकेट गुमाउँदै १२६ रनको योगफल तयार पारेको थियो। नेपालका लागि कप्तान इन्दु बर्माले अविजित ४६ रन र कविता कुवँरले ३३ रनको योगदान दिए। त्यस्तै रुबी पोदारले १७ र पूजा महतोले १५ रन जोडे।
१२७ रनको लक्ष्य पछ्याएको मलेसियाले ८ बल बाँकी छँदै ८ विकेट गुमाएर लक्ष्य पूरा गर्यो। नेपालका तर्फबाट बलिङमा रिया शर्माले ३ विकेट लिइन्। मनिषा उपाध्याय र रुविना क्षेत्रीले समान २–२ विकेट तथा सिता राना मगरले १ विकेट लिए पनि टोलीलाई जित दिलाउन सकेनन्।
