काठमाडौं, जेठ १३ । प्रथम राष्ट्रपति डा. रामवरण यादवले गणतन्त्र दिवस समारोहमा प्रधानमन्त्री बालेन शाहले राष्ट्रका नाममा सम्बोधन गर्ने विश्वास व्यक्त गरेका छन्। नेपाल प्रेस युनियनको विधान सम्मेलनलाई सम्बोधन गर्दै उनले यस्तो धारणा राखेका हुन्।
प्रधानमन्त्रीले कार्यभार सम्हालेको दुई महिना पुगिसक्दा पनि हालसम्म संसद् वा राष्ट्रका नाममा कुनै औपचारिक सम्बोधन नगरेको तर्फ पूर्वराष्ट्रपति यादवले ध्यानाकर्षण गराए। संसदीय व्यवस्थामा प्रधानमन्त्री नै कार्यकारी प्रमुख हुने भएकाले मुलुकलाई कता लैजाने र संघर्षका उपलब्धिलाई कसरी जोगाउने भन्नेबारे प्रधानमन्त्रीको दृष्टिकोण सुन्न सम्पूर्ण नेपाली जनता आतुर रहेको उनले बताए।
“युवाहरू संसद् र सरकारमा आउनु नेपाली जनताको १०० वर्षको योगदानको उपलब्धि हो,” यादवले भने, “यसलाई संस्थागत गरेर कसरी अघि बढाउने भन्नेमा नेतृत्वले गम्भीरतापूर्वक सोच्न आवश्यक छ।”
यद्यपि, प्रधानमन्त्री शाह भने गणतन्त्र दिवसमा आफैँ सम्बोधन गर्ने पक्षमा देखिएका छैनन्। उनले मन्त्रिपरिषद्बाट निर्णय गराएर गणतन्त्र दिवसका अवसरमा सम्बोधन गरिदिन राष्ट्रपति रामचन्द्र पौडेललाई हालै पत्रसमेत पठाइसकेका छन्।
