काठमाडौँ। श्रम संस्कृति पार्टीका अध्यक्ष हर्क साम्पाङले प्रतिनिधि सभा नियमावलीअनुसार रुलिङ गरेर प्रधानमन्त्री बालेन शाहलाई संसद्मा उपस्थित गराउन माग गरेका छन्। प्रधानमन्त्रीलाई संसद्मा ल्याउन नसक्ने हो भने नियमावलीकै व्यवस्था प्रयोग गरेर आफूलाई संसद्बाट निकाल्न उनले सभामुखलाई आग्रह गरेका छन्।
बुधबार प्रतिनिधि सभाको बैठक सुरु भएलगत्तै सांसद साम्पाङले आफ्नो स्थानबाट उठेर पर्चा देखाउँदै विरोध जनाएका थिए। त्यसपछि सभामुख डिपी अर्यालले उनलाई बोल्नका लागि समय दिएका थिए।
संसद्मा बोल्दै साम्पाङले प्रतिनिधि सभा नियमावलीको नियम १५ को उपनियम २ अनुसार प्रधानमन्त्रीलाई संसद्मा आउन रुलिङ गर्नुपर्ने माग गरे। यदि रुलिङ नगर्ने हो भने नियमावलीकै नियम ३१ को उपनियम १ लागू गरेर आफूलाई सदनबाट बाहिर निकाल्ने आदेश दिन उनले चुनौती दिए।
‘सभामुखले प्रधानमन्त्रीलाई रुलिङ गरेर ल्याउन सक्नु भएको छैन। नियमावलीको नियम १५ को उपनियम २ अनुसार प्रधानमन्त्रीलाई सदनमा जवाफदेही बनाएर ल्याउन सक्नुहुन्न भने नियम ३१ को उपनियम १ लागू गरेर मलाई यो सदनबाट निष्कासन गरी सदनको गरिमा बढाइदिनूस्। निष्कासनको आदेश दिनुपर्यो,’ उनले भने।
