काठमाडौं, १२ जेठ ।
चिकित्सा शिक्षा आयोगको रिक्त उपाध्यक्ष पदको जिम्मेवारी डा. श्रीकृष्ण गिरीले पाएका छन्। प्रधानमन्त्री एवं आयोगका अध्यक्ष बालेन्द्र शाहले सोमबार डा. गिरीलाई सो जिम्मेवारी सुम्पेका हुन्।
नवनियुक्त उपाध्यक्ष डा. गिरीले सोमबार नै आयोगको कार्यालय पुगेर आफ्नो कार्यभार सम्हालेका छन्। “मैले नियुक्तिको पत्र बुझिसकेको छु र अर्को व्यवस्था नभएसम्मका लागि आयोगको जिम्मेवारी सम्हाल्ने गरी कार्यक्षेत्रमा खटिएको छु,” डा. गिरीले जानकारी दिए।
सरकारले हालै ‘सार्वजनिक पदाधिकारीको पदमुक्ति सम्बन्धी विशेष व्यवस्था गर्न बनेको अध्यादेश’ जारी गरेसँगै आयोगका तत्कालीन उपाध्यक्ष डा. अञ्जनी कुमार झा लगायतका पदाधिकारीहरू पदमुक्त भएका थिए। सो अध्यादेशपछि रिक्त रहेको शीर्ष पदमा सरकारले डा. गिरीलाई ल्याएको हो।
डा. गिरी चिकित्सा शिक्षा आयोगका संस्थापक उपाध्यक्ष समेत हुन्। आयोग स्थापना भएपछि पहिलो उपाध्यक्षका रूपमा उनले ४ वर्षे सफल कार्यकाल पूरा गरेर अवकाश पाएका थिए। आयोगको कार्यप्रणाली र कानुनी संवेदनशीलता बुझेका कारण उनलाई पुनः यो महत्त्वपूर्ण जिम्मेवारी दिइएको बुझिएको छ।
