कोशी प्रदेशका मुख्यमन्त्री हिक्मतकुमार कार्कीले संघीय सरकारले प्रदेशको क्षेत्राधिकारमाथि निरन्तर हस्तक्षेप गरिरहेको आरोप लगाएका छन् । प्रदेशको आगामी बजेट निर्माणका सन्दर्भमा सांसदहरूसँग सुझाव संकलन गर्न आयोजित कार्यक्रममा बोल्दै उनले केन्द्र सरकारको कार्यशैलीप्रति गम्भीर असन्तुष्टि जनाएका हुन्।
मुख्यमन्त्री कार्कीले संघीय सरकारले केही दिनअघि मात्रै प्रदेशको क्षेत्राधिकारभित्र पर्ने नयाँ सवारी साधन दर्ता कार्य रोक्न परिपत्र गरेको दृष्टान्त दिए । “यातायात क्षेत्र पूर्ण रूपमा प्रदेशको अधिकारभित्र पर्छ, तर संघीय सरकारले हामीसँग कुनै सल्लाह नै नगरी एक्कासि नयाँ दर्ता बन्द गर्ने निर्णय गर्यो,” उनले भने, “यसले प्रदेशको राजस्व आम्दानीमा ठूलो धक्का लाग्नेछ। हाम्रा हातखुट्टा बाँध्ने काम भइरहेको छ।”
संविधानले स्पष्ट रूपमा प्रदान गरेका अधिकारहरू समेत संघीय सरकारका विभिन्न परिपत्रका कारण संकुचित हुँदै गएको उनको भनाइ छ । मुख्यमन्त्री कार्कीले केन्द्रका मन्त्री र सचिवस्तरीय निर्णयका नाममा प्रदेश कानुन र संविधानको भावनाविपरीतका निर्देशनहरू आउने गरेको गुनासो गरे।
यसका साथै, संघीय सरकारले पठाएका परिपत्रहरू कर्मचारीले तत्काल पालना गर्ने तर प्रदेशका आफ्नै कानुन कार्यान्वयनमा भने अटेरी गर्ने प्रवृत्ति बढेको भन्दै मुख्यमन्त्रीले असन्तुष्टि व्यक्त गरेका छन् ।
