जियुकुआन (चीन), ११ जेठ : चीन अपन अन्तरिक्ष महत्त्वाकांक्षाकेँ नयाँ चरणमे पहुँचेबाक प्रयासस्वरूप शेनझोउ–२३ अन्तरिक्ष यान प्रक्षेपण केलक अइछ । तीन अन्तरिक्ष यात्री सवार अइ मिसनमे एक गोटे सदस्यकेँ अन्तरिक्ष स्टेशनमे पूरा एक साल राखएके योजना समावेश कएल गेल अइछ ।
शेनझोउ–२३ अन्तरिक्ष यान उत्तरपश्चिम चीनस्थित जियुकुआन स्याटेलाइट प्रक्षेपण केन्द्रसँ रैबदिन राइतमे अन्तरिक्षदिस पठाएल गेल अइछ । चीन सन् २०३० धैर पहिल बेर मानवकेँ चन्द्रमामे अवतरण करेबाक लक्ष्यदिस तैयारी तीव्र बनाइब रहल समय अइ प्रक्षेपणकेँ विशेष महत्त्वसँ देखल गेल अइछ ।
अइ मिसनमे कमान्डर झु याङ्झु, झाङ झियुआन आ लाइ का–यिङ सहभागी छैथ ।
सरकारी सञ्चारमाध्यम अनुसार शेनझोउ–२३ के टोली अन्तरिक्षमे दर्जन वैज्ञानिक तथा प्रयोगात्मक परियोजनासभ सञ्चालन करबाक तैयारी केलक अइछ । ई टोली हाल २ सओ दिनसँ बेसी समय टियाङ्गोङ अन्तरिक्ष स्टेशनमे कार्यरत शेनझोउ–२१ के चालक दलसँ कक्षमे भेट करबाक तथा कार्य हस्तान्तरण प्रक्रिया पूरा करबाक अपेक्षा कएल गेल अइछ ।
विश्व अन्तरिक्ष प्रतिस्पर्धामे अमेरिकाकेँ चीनक प्रमुख प्रतिद्वन्द्वीके रूपमे देखल जाइत अइछ । अमेरिकी अन्तरिक्ष निकाय नासा सेहो सन् २०२८ धैर पुनः चन्द्रमाके सतहमे अन्तरिक्ष यात्री अवतरण करेबाक लक्ष्य निर्धारण कएने अइछ ।
चीनक अन्तरिक्ष स्टेशन टियाङ्गोङ पहिल बेर सन् २०२१ मे चिनियाँ चालक दलकेँ स्वागत कएने छल ।
