काठमाडौं। काभा (CAVA) महिला भलिबल च्याम्पियनसिप आज (बिहीबार) देखि काठमाडौंमा सुरु हुँदैछ। त्रिपुरेश्वरस्थित दशरथ रंगशालाको कभर्डहलमा आयोजना हुने यस प्रतियोगितामा घरेलु टोली नेपालसहित सेन्ट्रल एसियाका ८ राष्ट्रको सहभागिता रहेको छ।
प्रतियोगिताको पहिलो दिन आज भव्य उद्घाटन समारोहसहित तीनवटा खेलहरू हुनेछन्। जसमा घरेलु टोली नेपालले आफ्नो पहिलो खेलमै बलियो प्रतिद्वन्द्वी छिमेकी देश भारतको सामना गर्नेछ।
आजको खेल तालिका
नेपाल भलिबल संघका अनुसार प्रतियोगिताको उद्घाटन र खेलहरूको तालिका यसप्रकार छ:
पहिलो खेल (बिहान ११:०० बजे): इरान विरुद्ध बंगलादेश (समूह ‘बी’)
उद्घाटन समारोह (दिउँसो २:०० बजे)
दोस्रो खेल (दिउँसो ३:३० बजे): नेपाल विरुद्ध भारत (समूह ‘ए’)
तेस्रो खेल (साँझ ६:०० बजे): किर्गिस्तान विरुद्ध माल्दिभ्स (समूह ‘ए’)
समूह विभाजन र खेल प्रणाली
च्याम्पियनसिपमा सहभागी ८ टोलीलाई दुई समूहमा विभाजन गरिएको छ:
समूह ‘ए’: नेपाल, भारत, किर्गिस्तान र माल्दिभ्स
समूह ‘बी’: इरान, काजाकिस्तान, श्रीलंका र बंगलादेश
प्रतियोगिताको सुरुवाती चार दिन समूह चरणका खेलहरू हुनेछन्, जहाँ दैनिक ३–३ खेल खेलाइनेछ। समूह चरणको समाप्तिपछि दुवै समूहका शीर्ष दुई–दुई टोली सेमिफाइनलमा प्रवेश गर्नेछन्। समूहमा तेस्रो र चौथो स्थानमा रहने टोलीहरूले भने ‘क्लासिफिकेसन म्याच’ (वरियता निर्धारण खेल) खेल्नेछन्।
समूह ‘ए’ को विजेताले समूह ‘बी’ को उपविजेतासँग र समूह ‘बी’ को विजेताले समूह ‘ए’ को उपविजेतासँग सेमिफाइनलमा प्रतिस्पर्धा गर्नेछन्। सेमिफाइनलका विजेता टोलीहरूले जेठ १५ गते उपाधिका लागि फाइनल खेल खेल्नेछन्। प्रतियोगिता अवधिभर फाइनलसहित कूल २० खेलहरू हुनेछन्।
विजेता टोली एसिया कपमा छनोट हुने
यस च्याम्पियनसिपको विजेता टोली सिधै एसिया कपका लागि छनोट हुने नेपाल भलिबल संघले जनाएको छ। पछिल्लो समय नेपालले काभाका विभिन्न अन्तर्राष्ट्रिय प्रतियोगिताहरू सफलतापूर्वक आयोजना गर्दै सेन्ट्रल एसिया क्षेत्रमा भलिबलको बलियो ‘हब’ का रूपमा आफूलाई स्थापित गरिरहेको छ।
नेपाली भलिबलका लागि आजको दिन विशेष छ। वि.सं. २०७४ सालमा नेपाल सरकारले भलिबललाई नेपालको राष्ट्रिय खेल घोषणा गरेको थियो। सोही ऐतिहासिक निर्णयको सम्झनामा नेपाल भलिबल संघले हरेक वर्ष जेठ ८ गतेलाई ‘नेसनल भलिबल डे’ (राष्ट्रिय भलिबल दिवस) का रूपमा मनाउँदै आएको छ। राष्ट्रिय खेल दिवसकै अवसरमा घरेलु मैदानमा ठूलो अन्तर्राष्ट्रिय प्रतियोगिता सुरु हुन लागेकाले नेपाली खेलप्रेमीहरू निकै उत्साहित छन्।
