काठमाडौँ । संवैधानिक परिषद्बाट प्रधानन्यायाधीश पदका लागि सिफारिस गरिएका सर्वोच्च अदालतका न्यायाधीश मनोज कुमार शर्मामाथिको संसदीय सुनुवाइ प्रक्रिया आज (मंगलबार) बाट सुरु हुँदैछ। सुनुवाइका लागि संसदीय सुनुवाइ समितिको बैठक मंगलबार बिहान ८ बजे सिंहदरबारस्थित विधायन व्यवस्थापन समितिको सभाकक्षमा बोलाइएको छ।
उजुरी आजै खोलिने, १० दिने म्याद सकियो
प्रधानन्यायाधीशमा सिफारिस शर्माविरुद्ध समितिमा सातवटा उजुरी परेका छन्। समितिकी उपसचिव सावित्रा शर्माका अनुसार सोमबार कार्यालय समयसम्म दर्ता भएका ती उजुरीहरू आजको बैठकमा खोलिने र अध्ययनका लागि समितिका सबै सदस्यहरूलाई वितरण गरिने तयारी छ। यसअघि समितिले गत वैशाख २५ गते शर्माविरुद्ध १० दिनको म्याद राखेर उजुरी आह्वान गरेको थियो।
नियुक्ति प्रक्रिया र वर्तमान विवाद
संवैधानिक परिषद्को गत वैशाख २४ गते बसेको बैठकले सर्वोच्च अदालतका न्यायाधीश शर्मालाई प्रधानन्यायाधीशमा नियुक्तिका लागि सिफारिस गरेको थियो। संवैधानिक व्यवस्था अनुसार संसदीय सुनुवाइ समितिले नाम अनुमोदन गरेपछि राष्ट्रपतिले प्रधानन्यायाधीश नियुक्त गर्ने कानुनी प्रावधान छ।
तर, सर्वोच्च अदालतको चौथो वरियतामा रहेका शर्मालाई वरिष्ठता मिचेर प्रधानन्यायाधीश बनाउन लागिएको भन्दै यो सिफारिस विवादमा परेको छ। शर्माको सिफारिसप्रति कायममुकायम (कामु) प्रधानन्यायाधीश सपना प्रधान मल्ल र नेपाल बार एशोसियसन लगायतले असन्तुष्टि जनाउँदै विरोध गरिरहेका छन्।
