काठमाडौँ । नेपाल कम्युनिष्ट पार्टी (एमाले) को केन्द्रीय सचिवालय बैठक आज बस्दैछ। पार्टी कार्यालय सचिव डा. भीष्म अधिकारीका अनुसार अध्यक्ष केपी शर्मा ओलीको निवास गुण्डुमा दिउँसो १ बजे बैठक बोलाइएको हो। यसअघि जेठ २ गते बस्ने भनिएको यो बैठक तयारी नपुगेको उल्लेख गर्दै आजका लागि सारिएको थियो।
११औँ महाधिवेशन सम्पन्न भएपछि नेताहरूको कार्यविभाजन हुन नसकेकाले आजको बैठक मुख्य गरी सोही विषयमा केन्द्रित हुने नेताहरूले बताएका छन्।
केन्द्रीय सदस्यहरूलाई पालिकाको जिम्मेवारी दिइने
पार्टीका एक पदाधिकारीका अनुसार संगठनलाई तल्लो तहदेखि नै चुस्त बनाउन केन्द्रीय सदस्यहरूलाई पालिका स्तरको जिम्मेवारी दिएर खटाउने तयारी गरिएको छ। आगामी स्थानीय तहको निर्वाचनमा पार्टीलाई बलियो बनाउने रणनीतिका साथ हरेक केन्द्रीय सदस्यलाई पालिकाको इन्चार्ज तोकेर कार्यक्षेत्रमा पठाइने ती पदाधिकारीले जानकारी दिए। यसका साथै केन्द्रीय विभाग तथा अन्य निकायहरूमा पनि जिम्मेवारी बाँडफाँटको टुङ्गो आजकै बैठकले लगाउनेछ।
बैठकका अन्य मुख्य एजेन्डाहरू:
केन्द्रीय कमिटी बैठकको मिति तय: गत फागुनमा सम्पन्न भएको निर्वाचनको विस्तृत समीक्षा गर्नका लागि केन्द्रीय कमिटीको बैठक बोलाउने र त्यसको मिति तय गर्ने।
सुकुमबासी समस्या र सरकारको आलोचना: सरकारले जबरजस्ती हटाएका सुकुमबासीहरूको व्यवस्थापनको सवाल तथा सरकारका पछिल्ला कामकारबाहीले जनतामा पारेको नकारात्मक असरका बारेमा समीक्षा र आगामी रणनीति तय गर्ने।
महाधिवेशनपछिको सांगठनिक स्वरुप र भावी राजनीतिक कार्यदिशा तय गर्नका लागि एमालेको आजको सचिवालय बैठकलाई निकै महत्त्वका साथ हेरिएको छ।
