काठमाडौँ, ३१ वैशाखः वर्षाका कारण स्कटल्यान्ड र अमेरिकाबीचको खेल रोकिएको छ । अमेरिकाले २६ दशमलव ४ ओभर खेल्दा खेल रोकिएको हो । अमेरिकाले चार विकेटको क्षतिमा १६० रन बनाएको छ । अमेरिकाका लागि स्मित पटेलले ७२ तथा कप्तान मोनाङ्क पटेलले १२ रन बनाए ।
यसअघि आइसीसी पुरुष क्रिकेट विश्वकप लिग–२ अन्तर्गत कीर्तिपुरस्थित त्रिवि क्रिकेट मैदानमा ट्स हारेर पहिला ब्याटिङ गरेको स्कटल्यान्डले ४७ ओभरमा ६ विकेट गुमाउँदै ३२१ रन बनायो । पचास ओभरको खेललाई वर्षाका कारण ४७ ओभरमा झारिएको हो । स्कटल्यान्डका लागि फिन्ले म्याकक्रेथले १०२ बल खेल्ने क्रममा ६ चौका र एक छक्काको मद्दतमा ७७ रन बनाए । विकेटकिपर म्याथ्यु क्रसले ३२ बलमा ८ चौका र दुई छक्काको सहयोगमा ५८ रन जोडे ।
त्यस्तै ब्रान्डन म्याकमुलनले ४० बलमा ५ चौका र ३ छक्कासहित ५५ रन, माइकल इङ्लिसले ३२, मार्क वाटले अविजित २५ तथा माइकल लिस्कले अविजित २८, कप्तान रिची बेरिङ्टनले १० तथा जर्ज मुन्सीले २० रनको योगदान दिए ।
बलिङतर्फ अमेरिकाका लागि सौरभ नेत्रवाल्कर र जसदीप सिंहले दुई दुई तथा मिलिन्द कुमार र शुभम रन्जनेले एक एक विकेट लिए ।
