काठमाडौँ । नेपाली कांग्रेसले सङ्घीय संसद्को संयुक्त बैठकमा प्रधानमन्त्री बालेन्द्र शाहको उपस्थिति र व्यवहारलाई लिएर गम्भीर आपत्ति जनाएको छ। राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गरिरहेका बेला प्रधानमन्त्री बीचमै बैठक हलबाट बाहिरिएको घटनालाई कांग्रेसले संसदीय मर्यादा र संवैधानिक परम्पराको प्रतिकूल भएको टिप्पणी गरेको हो।
कांग्रेस प्रवक्ता देवराज चालिसेले सोमबार एक विज्ञप्ति जारी गर्दै आफ्नै नेतृत्वको सरकारको नीति तथा कार्यक्रम प्रस्तुत भइरहेको उच्चस्तरीय तथा संवेदनशील समयमा प्रधानमन्त्री उपस्थित नरहनुले अप्रिय सन्देश प्रवाह गरेको उल्लेख गरेका छन्।
संसदीय संस्कारमाथि प्रश्न
विज्ञप्तिमा संयुक्त बैठक राष्ट्रिय महत्वको औपचारिक मञ्च भएको स्मरण गराउँदै प्रधानमन्त्रीको उक्त कार्यलाई अस्वाभाविक र अमर्यादित शैलीका रूपमा व्याख्या गरिएको छ। कांग्रेसले यस घटनाले संसदीय संस्कार र संवैधानिक निकायको गरिमामाथि नै प्रश्न उठाएको दाबी गरेको छ।
राष्ट्रिय पोसाक र गरिमाको विषय
प्रधानमन्त्रीको पोसाकका सम्बन्धमा संसद्भित्र उठेको चर्चालाई समेत कांग्रेसले विज्ञप्तिमा समेटेको छ। राष्ट्रिय पोसाक कानुनी रूपमा अनिवार्य नभए पनि संवैधानिक तथा राष्ट्रिय महत्वका अवसरहरूमा राजकीय पहिचान र सांस्कृतिक परम्पराको सम्मान गर्नु स्थापित अभ्यास रहेको कांग्रेसको भनाइ छ। राज्यको प्रतीकात्मक गरिमाप्रति सचेत रहनु जिम्मेवार ओहोदाका व्यक्तिको कर्तव्य हुने विज्ञप्तिमा उल्लेख छ।
संस्थागत अनुशासनको माग
लोकतन्त्रमा वैचारिक मतभेद स्वाभाविक भए पनि राज्यका अङ्गहरूबीचको पारस्परिक सम्मान र प्रतिबद्धता साझा राष्ट्रिय मूल्य हुनुपर्नेमा कांग्रेसले जोड दिएको छ। विज्ञप्तिमा भनिएको छ, “संसद् केवल सरकार निर्माणको गणितीय थलो मात्र नभई लोकतान्त्रिक संस्कार, संस्थागत अनुशासन र राष्ट्रिय सभ्यता प्रदर्शन गर्ने सर्वोच्च मञ्च पनि हो।”
कांग्रेसले आगामी दिनमा यस्ता गतिविधि दोहोरिन नदिन र संसदीय गरिमाको पूर्ण पालना गर्न सरकारको ध्यानाकर्षण समेत गराएको छ।
