काठमाडौँ । राष्ट्रिय परीक्षा बोर्डले सोमबार यस वर्षको माध्यमिक शिक्षा परीक्षा (SEE) को नतिजा सार्वजनिक गरेको छ। सार्वजनिक नतिजा अनुसार यस वर्ष ६५.९८ प्रतिशत विद्यार्थी उत्तीर्ण भएका छन्।
गत वर्षको तुलनामा यस वर्षको नतिजामा ४.१७ प्रतिशतले सुधार आएको बोर्डले जनाएको छ। गत वर्ष ६१.८१ प्रतिशत विद्यार्थी मात्र उत्तीर्ण भएका थिए।
जीपीए अनुसारको विवरण:
बोर्डका अनुसार विद्यार्थीहरूले प्राप्त गरेको जीपीए (GPA) को विस्तृत विवरण निम्न बमोजिम रहेको छ:
३.६० देखि ४.०० जीपीए: ४८ हजार ३९२ जना
३.२० देखि ३.६० जीपीए: ८० हजार ३७२ जना
२.८० देखि ३.२० जीपीए: ९४ हजार २२२ जना
२.४० देखि २.८० जीपीए: ५५ हजार ९७७ जना
२.०० देखि २.४० जीपीए: ५ हजार १९० जना
१.६० देखि २.०० जीपीए: ७ जना
यस वर्षको परीक्षामा कुल १ लाख ४६ हजार ५०७ जना विद्यार्थी ‘नन ग्रेडेड’ (NG) भएका छन्।
गएको चैत महिनामा सञ्चालित SEE परीक्षामा देशभरबाट कुल ५ लाख १२ हजार ४२१ विद्यार्थी सहभागी भएका थिए।
