काठमाडौँ — नेपाल कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहालले नेपाली कम्युनिष्ट आन्दोलनलाई सखाप पार्न देशी–विदेशी प्रतिक्रियावादी शक्तिहरू ठूलो योजनासहित लागिपरेको दाबी गरेका छन्।
आइतबार काठमाडौँमा आयोजित २६औँ निर्मल लामा स्मृति दिवसका अवसरमा बोल्दै दाहालले यस्तो बताएका हुन्। उनले वर्तमान राजनीतिक परिस्थिति र कम्युनिष्ट आन्दोलनको भविष्यबारे निम्न मुख्य बुँदाहरूमा जोड दिए:
संयोजक दाहालले कम्युनिष्ट पार्टीहरूले बाह्य शक्तिलाई दोष दिनुअघि आफ्नै कमजोरीहरूको गम्भीर समीक्षा गर्नुपर्ने बताए।
विगतका गल्तीहरू स्वीकार गरेर अघि बढ्ने आँट नगरे श्रमजीवी जनताप्रति ठूलो विश्वासघात हुने उनको तर्क थियो।
छरिएर रहेका कम्युनिष्ट शक्तिहरू एकताबद्ध भई नयाँ ढंगले आन्दोलन अघि बढाउनुको विकल्प नरहेको उनले उल्लेख गरे।
दाहालले वर्तमान सरकारको कार्यशैलीप्रति कडा आपत्ति जनाउँदै सरकारले नै गरिब र निमुखा नागरिकलाई सबैभन्दा बढी दुःख दिएको आरोप लगाए।
“अहिले सरकारबाट सबैभन्दा बढी प्रहार हाम्रो ‘वर्ग आधार’ मानिने गरिब र श्रमजीवी जनतामाथि नै भइरहेको छ,” उनले भने, “यस्तो अवस्थामा कम्युनिष्टहरू वैचारिक रूपमा स्पष्ट भएर आफ्नो वर्गको पक्षमा उभिनु जरुरी छ।”
हाम्रो वर्गीय पक्षधरता कमजोर हुँदा प्रतिक्रियावादीहरूलाई खेल्ने ठाउँ मिलेको दाहालको विश्लेषण छ। उनले भने: कम्युनिष्टहरूबीचको एकताले मात्रै वर्ग संघर्षलाई उचाइमा पुर्याउन सकिन्छ। नेपाली जनताले अझै पनि कम्युनिष्ट पार्टीहरूमाथि नै भरोसा गरिरहेकाले सो भरोसा टुट्न दिनु हुँदैन।
