काठमाडौँ: त्रिभुवन विश्वविद्यालयका शीर्ष तीन पदाधिकारीहरूले आज आफ्नो पदबाट राजीनामा दिँदैछन्। उपकुलपति प्रा.डा. दीपक अर्याल, शिक्षाध्यक्ष प्रा.डा. खड्ग केसी र रजिस्ट्रार प्रा.डा. केदार रिजालले सामूहिक राजीनामा दिन लागेका हुन्।
सरकारले विश्वविद्यालयसम्बन्धी नयाँ अध्यादेश जारी गर्न राष्ट्रपतिसमक्ष पेस गरेसँगै नयाँ परिस्थिति सिर्जना भएको छ। यस्तो अवस्थामा सरकारलाई काम गर्न सहज वातावरण मिलोस् भन्ने उद्देश्यले आफूहरूले मार्गप्रशस्त गर्न लागेको पदाधिकारीहरूको भनाइ छ।
“हामीले आज राजीनामा दिँदैछौं,” शिक्षाध्यक्ष खड्ग केसीले पुष्टि गरे।
त्रिविमा सामान्यतया पदाधिकारीहरूको कार्यकाल ४ वर्षको हुन्छ। वर्तमान पदाधिकारीहरूको नियुक्ति विवरण यस प्रकार छ:
उपकुलपति प्रा.डा. दीपक अर्याल: २०८२ असार २५ गते तत्कालीन प्रधानमन्त्री केपी शर्मा ओलीद्वारा नियुक्त।
शिक्षाध्यक्ष प्रा.डा. खड्ग केसी र रजिस्ट्रार प्रा.डा. केदार रिजाल: २०८० चैतमा तत्कालीन प्रधानमन्त्री पुष्पकमल दाहाल ‘प्रचण्ड’द्वारा नियुक्त।
त्रिवि ऐनअनुसार प्रधानमन्त्री नै विश्वविद्यालयको कुलपति रहने व्यवस्था छ। सोही अनुसार पदाधिकारीहरूले कुलपतिसमक्ष आफ्नो राजीनामा बुझाउनेछन्। पछिल्लो समय त्रिवि सुधारका प्रयासहरूमा सक्रिय रहेका यी पदाधिकारीहरूको बहिर्गमनलाई शैक्षिक वृत्तमा चासोका साथ हेरिएको छ।
