आईसीसी विश्वकप लिग–२ त्रिकोणात्मक सिरिजअन्तर्गत आफ्नो दोस्रो खेलमा घरेलु टोली नेपाल ओमानसँग डीएल मेथडमा पराजित भएको छ।
बुधबार वर्षाले प्रभावित भएको सो खेलमा नेपाल ओमानसँग डीएल मेथडमा १ सय २ रनले पराजित भएको हो।
जारी सिरिजमा नेपालले पहिलो हार व्यहोरेको हो भने ओमानले पहिलो जित दर्ता गरेको छ। नेपालले पहिलो खेलमा युएईलाई ३७ रनले हराएको थियो भने ओमान पहिलो खेलमा युएईसँग २५ रनले पराजित भएको थियो।
ओमानले दिएको ३ सय ६ रनको विशाल लक्ष्य पछ्याएको नेपालले ३६.५ ओभरमा ७ विकेटको क्षतिमा १ सय ५५ रन बनाउँदा पानी परेपछि खेल रोकिएको थियो। वर्षाले खेल पुनः सुरु हुन नसकेपछि नेपालले जारी सिरिजमा पहिलो हार व्यहोरेको हो।
गुल्सन झा १४ र सोमपाल कामी २ रनमा नटआउट रहे। दीपेन्द्र सिंह ऐरीले ६० रन बनाउँदै पेभेलियन फर्किए। भिम सार्की २८ रनमा आउट भए। रोहित पौडेलले १०, आरिफ शेखले १४ रन थपे।
ओपनर कुशल भुर्तेल १ रन बनाउँदा एलबीडब्लुको धरापमा परे। आशिफ शेख १९ रनमा क्याच आउट भए।
रोहित कुमार पौडेल १० रन बनाउँदा नदीम खानको बलमा बोल्डआउट भए। १ रन बनाएका बसिर अहमद पनि नदीमकै बलमा आउट भए।
ओमानका लागि नदीम खानले ३ विकेट लिए। सकिल अहमदले २ तथा मुहम्मद इमरान र वसिम अलीले समान १–१ विकेट लिए।
त्यसअघि, कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको ओमानले निर्धारित ५० ओभरमा ८ विकेटको क्षतिमा ३ सय ५ रनको योगफल तयार पारेको थियो।
ओमानका ओपनर जतिन्दर सिंहले सर्वाधिक १ सय ३० रनको योगदान दिए। उनले ९६ बलमा १५ चौका र ५ छक्का प्रहार गरे। जतिन्दरले ७३ बलमा १३ चौका र ४ छक्काको सहयोगमा शतक पूरा गरे।
४८ बलमा १ चौका र १ छक्काको सहयोगमा ४८ रन बनाएका अशिष ओडेरा सन्दीप लामिछानेको बलमा आउट भए। सन्दीपले १५औं ओभरको दोस्रो बलमा अशिषलाई पेभेलियनको बाटो देखाए।
आर्यन राजु विसले ३५ र हमद मिर्जाले ३० रन थपे।
नेपालका लागि सोमपाल कामीले ४ विकेट लिए भने सन्दीप लामिछाने र दीपेन्द्र सिंह ऐरीले समान २–२ विकेट लिए।
सिरिजको तेस्रो खेलमा नेपालले पर्सि (शुक्रबार) युएईसँग पुनः खेल्नेछ।
