काठमाडौँ (वैशाख १६, २०८३) – आईसीसी विश्वकप लिग–२ त्रिकोणात्मक सिरिजअन्तर्गत ओमनले घरेलु टोली नेपाललाई जितका लागि ३०६ रनको विशाल लक्ष्य दिएको छ।
कीर्तिपुरस्थित त्रिवि क्रिकेट मैदानमा टस जितेर पहिले ब्याटिङ रोजेको ओमनले निर्धारित ५० ओभरमा ८ विकेट गुमाउँदै ३०५ रन बनायो। ओमनका आक्रामक ओपनर जतिन्दर सिंहले ९६ बलमा १५ चौका र ५ छक्काको मद्दतले १३० रनको शतकीय पारी खेले।
जतिन्दरले ७३ बलमै १३ चौका र ४ छक्का प्रहार गर्दै शतक पूरा गरे। अशिष ओडेराले ४८ बलमा १ चौका र १ छक्का सहित ४८ रन बनाए, तर सन्दीप लामिछानेको बलमा आउट भए। सन्दीपले १५औँ ओभरको दोस्रो बलमा अशिषलाई पेभेलियनको बाटो देखाए।
यसैगरी, आर्यन राजु विसले ३५ र हमद मिर्जाले ३० रनको योगदान दिए।
नेपालका लागि सोमपाल कामीले उत्कृष्ट चार विकेट लिए। सन्दीप लामिछाने र दीपेन्द्रसिंह ऐरीले समान दुई–दुई विकेट हात पारे।
नेपाल अब केहीबेरमा जवाफी ब्याटिङ गर्दै ३०६ रनको विशाल लक्ष्य पछ्याउनेछ।
