काठमाडौँ: काठमाडौँ महानगरपालिकाले आज (शनिबार) देखि महानगरभित्रका सुकुमवासी बस्ती हटाउने कार्य सुरु गर्ने भएको छ। पहिलो चरणमा थापाथली, मनोहरा, सिनामंगल र गैरिगाउँका बस्तीहरू हटाउने तयारी गरिएको महानगरले जनाएको छ।
महानगरको योजना अनुसार, सुरक्षाकर्मी र डोजरसहितको टोली सुरुमा थापाथली पुग्नेछ र त्यसपछि सिनामंगल क्षेत्रमा परिचालन हुनेछ। बिहीबार साँझ नै महानगरको टोलीले ती क्षेत्रहरूमा माइकिङ गर्दै शुक्रबारसम्म बस्ती खाली गर्न अन्तिम चेतावनी दिएको थियो।
महानगरले शुक्रबारसम्म बस्ती खाली नगरे शनिबारदेखि बल प्रयोग गरिने र त्यस क्रममा हुने संरचनाको क्षति वा व्यक्तिगत सम्पत्तिको जिम्मेवारी सम्बन्धित व्यक्तिले नै लिनुपर्ने स्पष्ट पारेको छ। महानगरको यस कदमपछि कतिपय स्थानीयले शुक्रबारदेखि नै आ-आफ्नो सामान लिएर बस्ती छाड्न थालेका छन्। पहिलो चरणको अभियान सफल भएपछि दोस्रो चरणमा अन्य बाँकी बस्तीहरू पनि हटाइने बताइएको छ।
