काठमाडौँ, वैशाख ७ | राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले गृहमन्त्री सुधन गुरुङको विवादित छवि र व्यवसायी दिपक भट्टसँगको व्यापारिक सम्बन्धबारे प्रधानमन्त्री र रास्वपा नेतृत्वसँग स्पष्टीकरण माग गर्नुभएको छ।
सोमबार काठमाडौँमा आयोजित एक कार्यक्रममा बोल्दै अध्यक्ष लिङ्देनले सुशासनको नारा लगाउने सरकारका गृहमन्त्री नै गम्भीर आर्थिक प्रश्नमा मुछिनु लज्जास्पद भएको बताउनुभयो।
सम्पत्ति शुद्धीकरण मुद्दामा पक्राउ परेका व्यवसायी दिपक भट्टको ‘स्टार माइक्रो इन्स्योरेन्स’मा गृहमन्त्री गुरुङको आफ्नै नाममा शेयर रहेको कागज सार्वजनिक हुनुले सरकारको नियतमाथि प्रश्न उठेको, सुशासनको कुरा गर्ने गृहमन्त्री र उनको पार्टीका सभापतिले यो ‘अपवित्र’ साझेदारीबारे मौन बस्न नहुने र तत्काल आफ्नो पोजिसन क्लियर गर्नुपर्ने , लाइसेन्स नवीकरण जस्ता साना विषयमा भिडियो बनाएर ‘स्टन्ट’ गर्दैमा देश नचल्ने भन्दै गृहमन्त्रीको कार्यशैलीमाथि लिङदेनले कटाक्ष गरेका छन् ।
गृहमन्त्री गुरुङमाथि पक्राउ परेका व्यवसायी दिपक भट्टसँग व्यावसायिक साझेदारी गरेको र सो विवरण आफ्नो सम्पत्ति विवरणमा लुकाएको आरोप लागेको छ। राप्रपाले यो विषयलाई ‘गम्भीर भ्रष्टाचार र नैतिक पतन’को रुपमा व्याख्या गर्दै सदन र सडकबाट दबाब बढाउने संकेत दिएको छ।
