काठमाडौँ – नेपाली क्रिकेटका लागि आगामी सोमबार र मंगलबार ऐतिहासिक दिन हुने भएको छ। त्रिवि क्रिकेट मैदान (टीयू) को स्तरोन्नतिपछि नेपालले पहिलोपटक आफ्नै घरेलु मैदानमा फ्लडलाइट (रातको समय) मा अन्तर्राष्ट्रिय टी-२० शृंखला खेल्दैछ। यूएईविरुद्ध हुने यस दुई खेलको शृंखलाले नेपाली क्रिकेटमा पूर्वाधार र नेतृत्व दुवै हिसाबले नयाँ मोड ल्याएको छ।
नेतृत्वमा फेरबदल: दीपेन्द्र नयाँ कप्तान, रोहित ओडीआईमा सीमित
यस शृंखलाका लागि नेपाल क्रिकेट संघ (क्यान) ले आश्चर्यजनक निर्णय गर्दै कप्तानमा परिवर्तन गरेको छ। टी-२० विश्वकपसम्म टोलीको नेतृत्व गरेका रोहित पौडेललाई १५ सदस्यीय टोलीबाट बाहिर राख्दै दीपेन्द्रसिंह ऐरीलाई कप्तानीको जिम्मेवारी सुम्पिएको छ।
क्यानका प्रवक्ता छुम्बी लामाका अनुसार यो एक ‘दीर्घकालीन योजना’ हो। रोहित अब ओडीआई टोलीको कप्तानमा सीमित हुनेछन् भने टी-२० का लागि छुट्टै नेतृत्व विकास गर्ने क्यानको रणनीति देखिएको छ। नेपाली क्रिकेट इतिहासमा दुई अलग फर्म्याटका लागि दुई अलग कप्तान नियुक्त गरिएको यो पहिलोपटक हो।
फ्लडलाइटमा पहिलो अन्तर्राष्ट्रिय अनुभव
यसअघि नेपाल प्रिमियर लिग (एनपीएल) रात्रिकालीन समयमा खेलिए पनि अन्तर्राष्ट्रिय टोली आएर फ्लडलाइटमा खेल्न लागेको यो पहिलो अवसर हो। “सरकारले बनाएको संरचनामा पहिलोपटक राति अन्तर्राष्ट्रिय खेल हुनु समग्र क्रिकेट विकासका लागि गर्वको विषय हो,” प्रवक्ता लामाले बताए।
टोलीमा व्यापक परिवर्तन: सिनियर खेलाडी ‘आराम’ मा
नयाँ कप्तानसँगै टोलीको स्वरूप पनि फेरिएको छ। टोलीका अनुभवी पेस जोडी सोमपाल कामी र करण केसी टी-२० टोलीबाट बाहिरिएका छन्। उनीहरूलाई अब ओडीआई फर्म्याटमा मात्र प्रयोग गरिने योजना छ। त्यस्तै, नियमित विकेटकिपर आसिफ शेख पनि यस शृंखलामा देखिने छैनन्।
कस्तो छ टोलीको सन्तुलन?
अनुभवी बलरहरूको अभावमा नेपालको पेस बलिङको जिम्मा नन्दन यादव र डेब्युको पर्खाइमा रहेका हेमन्त धामीको काँधमा आएको छ। टोलीमा अलराउन्डरहरूको वर्चस्व छ:
मुख्य बलर: सन्दीप लामिछाने, शाहब आलम, नन्दन यादव र हेमन्त धामी।
अलराउन्डर विकल्प: कप्तान दीपेन्द्र, कुशल भुर्तेल, कुशल मल्ल, आरिफ शेख, गुल्सन झा, सन्तोष यादव, शेर मल्ल र बसिर अहमद।
ओपनिङ: कुशल भुर्तेलसँगै लोकेश बम वा अर्जुन साउदले ओपनिङ गर्ने सम्भावना छ।
नेपालको १५ सदस्यीय टोली:
दीपेन्द्रसिंह ऐरी (कप्तान), कुशल भुर्तेल, कुशल मल्ल, सन्दीप जोरा, आरिफ शेख, बसिर अहमद, गुलशन झा, लोकेस बम, सन्दीप लामिछाने, नन्दन यादव, सन्तोष यादव, अर्जुन साउद, हेमन्त धामी, साहब आलम र शेर मल्ल।
