काठमाडौँ, ३ वैशाख । राष्ट्रिय सभाका अध्यक्ष नारायणप्रसाद दाहालले जलवायु परिवर्तनका कारण सहरहरू दिनानुदिन जोखिमयुक्त बन्दै गएको बताउनुभएको छ। जलवायु-अनुकूलनशील सहरीकरण सुनिश्चित गर्न संसद् र सांसदहरूको भूमिका महत्वपूर्ण हुनेमा उहाँले जोड दिनुभयो।
अन्तर-व्यवस्थापिका संघ (IPU) को १५२ औँ महासभामा भाग लिन टर्कीको इस्तानबुलमा रहनुभएका अध्यक्ष दाहालले असंलग्न आन्दोलन संसदीय सञ्जालको पाँचौँ सम्मेलनलाई सम्बोधन गर्दै उक्त कुरा बताउनुभएको हो।
अध्यक्ष दाहालले दक्षिण एसिया, विशेषगरी नेपाल जलवायु परिवर्तनबाट अत्यधिक प्रभावित क्षेत्र रहेको उल्लेख गर्नुभयो। हिमाली देशको रूपमा नेपालको वातावरणीय प्रणाली अत्यन्त संवेदनशील रहेको भन्दै उहाँले बाढी, पहिरो र कृषि क्षेत्रमा परेको असरले जलवायु संकटको गम्भीरता झल्काएको बताउनुभयो।
राजधानी काठमाडौँले भोगिरहेको अव्यवस्थित सहरीकरण, वायु प्रदूषण, भूमिगत पानीको घट्दो सतह र चरम मौसमी घटनाहरूको उदाहरण दिँदै उहाँले भन्नुभयो, “जलवायु-अनुकूलनशील सहरीकरण नेपालका लागि अब विकल्प नभई अनिवार्य आवश्यकता बनेको छ।”
नेपालले जलवायु अनुकूलन, न्यूनीकरण र अन्तर्राष्ट्रिय सहकार्यलाई प्राथमिकतामा राखेर नीति निर्माण गरिरहेको जानकारी दिँदै अध्यक्ष दाहालले विश्वव्यापी चुनौती समाधानका लागि सामूहिक अन्तर्राष्ट्रिय प्रयास अपरिहार्य रहेको बताउनुभयो। उहाँले संसदीय कूटनीतिमार्फत दिगो, समावेशी र सुरक्षित सहरी भविष्य निर्माणका लागि संयुक्त प्रतिबद्धता व्यक्त गर्न सबैलाई आग्रह गर्नुभयो।
