काठमाडौँ — इरान र अमेरिकाबीचको तनावपूर्ण परिस्थितिबीच इरानी फौजद्वारा बन्दी बनाइएका नेपाली युवा अमृत झा बुधबार रिहा भएका छन्। परराष्ट्र मन्त्रालयले उनी मुक्त भएको पुष्टि गर्दै सुरक्षित रूपमा नेपाल फर्काउने प्रक्रिया सुरु भएको जनाएको छ।
परराष्ट्र मन्त्री शिशिर खनालले सेतोपाटीसँग कुरा गर्दै अमृत झा परिवारको सम्पर्कमा आइसकेको जानकारी दिए। “इरानस्थित नेपाली महावाणिज्य दूतावास र कतारस्थित नेपाली दूतावासले झा रिहा भएको पुष्टि गरेका छन्। उहाँ अहिले इरानकै केशम टापुमा हुनुहुन्छ,” मन्त्री खनालले भने।
कसरी परेका थिए कब्जामा?
मार्च २१ (करिब दुई महिनाअघि)
स्थान: दक्षिणी इरानको स्ट्रेट अफ हर्मुज क्षेत्र।
घटना: पानीजहाज चालकका रूपमा कार्यरत ३२ वर्षीय झालाई इरानी सुरक्षा फौजले जहाजसहित नियन्त्रणमा लिएको थियो।
अन्य बन्दी: झासँगै चालक दलका अन्य ६ जना भारतीय नागरिक पनि पक्राउ परेका थिए।
उदयपुरको त्रियुगा नगरपालिकाका स्थायी बासिन्दा ३२ वर्षीय झा विगत १० वर्षदेखि दुबईका कम्पनीहरूमा आबद्ध भई जहाज चालकको रूपमा काम गर्दै आएका थिए। थाइल्यान्डबाट जहाज चालकको तालिम लिएका उनी पछिल्लो पटक दुई वर्षअघि रोजगारीका लागि दुबई गएका थिए।
मन्त्री खनालका अनुसार झाको साथमा एउटा चिठी समेत रहेको जानकारी प्राप्त भएको छ, यद्यपि त्यसको बेहोरा खुल्न बाँकी छ। नेपाल सरकारले आवश्यक कानुनी र कूटनीतिक प्रक्रिया पूरा गरी उनलाई जतिसक्दो छिटो नेपाल ल्याउने तयारी गरिरहेको छ।
