झापा, वैशाख २ | झापाको मेचीनगरमा भएको मोटरसाइकल दुर्घटनामा परी एक सशस्त्र प्रहरी जवानको मृत्यु भएको छ । मृत्यु हुनेमा पाँचथरको फिदिम नगरपालिका–१२ घर भई हाल बाहुनडाँगीस्थित सशस्त्र प्रहरीको बोर्डर आउट पोस्ट (बीओपी) मा कार्यरत ३५ वर्षीय सशस्त्र प्रहरी सहायक हवल्दार सचिन तामाङ रहेका छन् ।
जिल्ला प्रहरी कार्यालय झापाका अनुसार, मेचीनगर नगरपालिका–२ स्थित दुर्गा मन्दिर नजिकै मदन भण्डारी राजमार्गमा मंगलबार साँझ करिब साढे ५ बजेतिर दुर्घटना भएको हो । तिरिङ खोलाबाट बाहुनडाँगीतर्फ जाँदै गरेको मे ७ प ९६५ नम्बरको मोटरसाइकल आफैँ अनियन्त्रित भई सडकमा पल्टिएको थियो ।
दुर्घटनामा मोटरसाइकलको पछाडि सवार तामाङको नाक र शरीरका विभिन्न भागमा गम्भीर चोट लागेको थियो । उनलाई तत्काल उपचारका लागि बिर्तामोडस्थित बीएण्डसी अस्पताल लगिएको भए तापनि उपचारकै क्रममा साँझ ६:४५ बजे चिकित्सकले मृत घोषणा गरेका थिए ।
दुर्घटनामा मोटरसाइकल चालक झापा अर्जुनधारा नगरपालिका–१ निवासी ४० वर्षीय सशस्त्र प्रहरी हवल्दार डिल्लीराम सुब्बा समेत घाइते भएका छन् । सोही बीओपीमा कार्यरत सुब्बाको हातमा सामान्य चोट लागेको र अवस्था सामान्य रहेको प्रहरीले जनाएको छ । घटनाबारे थप अनुसन्धान भइरहेको छ ।
