राष्ट्रिय स्वतन्त्र पार्टी (रास्वपा) ले प्रतिनिधि सभाको उपसभामुख पदका लागि श्रम संस्कृति पार्टीकी उम्मेदवार रूबी कुमारी ठाकुरलाई समर्थन गर्ने औपचारिक निर्णय गरेको छ।
सिंहदरबारस्थित रास्वपा संसदीय दलको कार्यालयमा बसेको बैठकले ठाकुरलाई मतदान गर्ने निर्णय गरेको हो।
बैठकमा प्रधानमन्त्री एवं संसदीय दलका नेता बालेन शाह र पार्टी सभापति रवि लामिछाने लगायतका नेताहरूको उपस्थिति थियो।
उपसभामुखका लागि श्रम संस्कृति पार्टीकी २५ वर्षीया रूबी कुमारी ठाकुर र राप्रपाकी सरस्वती लामाबीच प्रतिस्पर्धा हुँदैछ।
ठाकुरको उम्मेदवारी दर्तामा रास्वपाका सांसद अशोक कुमार चौधरीले समर्थन गर्नुभएको छ।
प्रतिनिधि सभामा रास्वपाको झण्डै दुई तिहाइ बहुमत रहेको वर्तमान अवस्थामा, रास्वपाको समर्थन पाएसँगै ठाकुर उपसभामुखमा निर्वाचित हुने निश्चित देखिएको छ। संवैधानिक व्यवस्था अनुसार सभामुख र उपसभामुख फरक दल र लिंगको हुनुपर्ने भएकाले, सभामुखमा रास्वपाका डोलप्रसाद अर्याल निर्वाचित भइसकेका कारण रास्वपाले उपसभामुखमा अन्य दललाई सघाएको हो।
हर्क साम्पाङ नेतृत्वको श्रम संस्कृति पार्टीबाट समानुपातिक सांसद बनेकी रूबी ठाकुर सम्भवतः नेपालको संसदीय इतिहासकै कान्छी उपसभामुख बन्नेछिन्। निर्वाचनको कार्यक्रम चैत २७ गतेका लागि तय गरिएको छ।
