महोत्तरी, २४ चैत । महोत्तरीको एकडारा गाउँपालिका–५ स्थित बखरी चोकमा दुईवटा मोटरसाइकल एक आपसमा ठोक्किँदा तीन जना परीक्षार्थीको मृत्यु भएको छ ।
मंगलबार बर्दिवास-जलेश्वर सडकखण्ड अन्तर्गत बखरी चोकमा भएको उक्त दुर्घटनामा परी एसईई परीक्षा दिएर घरतर्फ फर्किँदै गरेका तीन विद्यार्थीको ज्यान गएको हो । घटनाको पुष्टि गर्दै महोत्तरीका प्रहरी उपरीक्षक हेरेम्ब शर्माले दुर्घटनामा तीन जनाको मृत्यु र अन्य तीन जना घाइते भएको जानकारी दिनुभयो ।
प्रहरीका अनुसार घटनास्थलबाट तीन जनाको प्रवेश पत्र समेत फेला परेको छ, जसबाट उनीहरू यस वर्षको एसईई परीक्षार्थी रहेको पुष्टि भएको हो । घाइतेहरूलाई तत्काल उद्धार गरी उपचारका लागि अस्पताल पठाइएको छ ।
घटनाको विस्तृत विवरण र मृतकहरूको पहिचान खुल्न बाँकी रहेको जिल्ला प्रहरी कार्यालय महोत्तरीले जनाएको छ । प्रहरीले घटनाबारे थप अनुसन्धान गरिरहेको छ ।
