काठमाडौँ – बचतकर्ताको सवा अर्ब रुपैयाँभन्दा बढी रकम अपचलन गरी फरार रहेका कुलेश्वरस्थित गौतमश्री बहुउद्देश्यीय सहकारी संस्था लिमिटेडका ५ जना पदाधिकारीलाई प्रहरीले पक्राउ गरेको छ। काठमाडौँ उपत्यका अपराध अनुसन्धान कार्यालयको टोलीले शुक्रबार उनीहरूलाई राजधानीका विभिन्न स्थानबाट नियन्त्रणमा लिएको हो।
पक्राउ पर्नेमा रवीन बिष्ट, मुख्य व्यवस्थापक , इमानसिंह राई, अध्यक्ष , लाल बहादुर क्षेत्री: प्रमुख कार्यकारी अधिकृत, अविन कुमार राई, प्रमुख कार्यकारी अधिकृत, कर्ण बहादुर राई, पूर्व लेखा सदस्य रहेका छन् ।
प्रहरीका अनुसार यी पदाधिकारीहरूमाथि बचतकर्ताको १ अर्ब ७५ करोड रुपैयाँ भन्दा बढी रकम हिनामिना गरेको आरोप छ। अनुसन्धानका क्रममा खुलेका मुख्य बुँदाहरू यस प्रकार छन्:
आकर्षक ब्याजको प्रलोभन देखाएर सर्वसाधारणबाट संकलन गरिएको निक्षेप सञ्चालकहरूले आफ्नो निजी कम्पनी र घरजग्गामा लगानी गरेका थिए।
बचतकर्ताको पैसाले काठमाडौँका विभिन्न ठाउँमा घरजग्गा खरिद गरेको पाइएको छ। हाल उक्त सम्पत्ति रोक्का राख्ने प्रक्रिया अघि बढाइएको छ।
पक्राउ परेका कर्मचारी र सञ्चालकहरूले सहकारीको आन्तरिक लेखा प्रणाली (सफ्टवेयर) मा समेत हेरफेर गरी हिनामिना लुकाउने प्रयास गरेका थिए।
सहकारीले बचत फिर्ता नगरेपछि १ हजार १ सयभन्दा बढी बचतकर्ताले सहकारी विभागमा उजुरी दिएका थिए। विभागले गौतमश्रीलाई ‘समस्याग्रस्त’ घोषणा गर्न सिफारिस गरेसँगै प्रहरीले उनीहरूमाथि निगरानी बढाएको थियो।
पक्राउ परेका पाँचै जनालाई थप अनुसन्धान र कानुनी कारबाहीका लागि सम्बन्धित वृत्तमा पठाइएको प्रहरीले जनाएको छ।
